an nighean neònach

Naidheachd bheag

2008-03-10T17:42:00.002+01:00

http://www.dlrcoco.ie/feile/Prizewinners07.htm
;)

Sgeulachd na seachdaine

2008-02-21T21:10:00.002+01:00

Thachair rudan neònach no èibhinn an-seo an seachdain seo. Madainn Di-Màirt, sheirm clag an dorais, dh' fhosgail mi agus thàinig cuideigin suas an staidhre. "Dè tha esan ag iarraidh?" smaoinich mi. Bha e coltach gun robh e ag iarraidh rudeigin a reic.
Nuair a chunnaic e mi nam sheasamh aig an doras, thuirt e: "Madainn mhath, a bheil na pàrantan a-staigh?" :o
Bha mi gun fhacal a ràdh an toiseach, an uair sin thuirt mi: "Dè na pàrantan...?" - Dh' innis e gun robh e airson sguabadairean a reic agus dh' fhaighnich e a-rithist am b' urrainn dha bruidhinn ri mo phàrantan. "Chan eil pàrantan an-seo idir!" thuirt mi. "Oh", ars esan, "tha mi duilich, eh, an tusa, eh... sibhse... bean an taighe?" Thuirt mi gur mi, agus tapadh leibh agus tioraidh.
Gun teagamh bha an duine agam, a chuala a h-uile rud bhon t-seòmar aige, dhen bheachd gun robh sin gu math èibhinn.

An latha as dèidh sin bha dùil aig cuideigin bho chompanaidh àrachais tighinn dhan taigh againn gus bruidhinn rium mu dheidhinn rud no dhà. Bha an duine agam air bruidhinn ris mar-tha aig an oifis aige, agus dh' innis e dhan duine ud gum bithinn-sa aig an taigh an latha sin.
Sheirm clag an dorais ma-tha agus dh' fhosgail mi. "Madainn mhath", thuirt mi ris an duine, agus bha esan a' coimhead rud beag troimhe-chèile. Thug e sùil air pàipear a bha na làimh agus thuirt e: "Eh, tha mi duilich, is dòcha gu bheil mi aig an doras ceàrr..." - "Cha chreid mi gu bheil", thuirt mise, "nach eil sibh a' tighinn bhon chompanaidh àrachais...?" - "Oh, tha", ars esan, "mar sin, an e is dòcha piuthair nas sìne agaibh no cuideigin eile san teaghlach a bhitheas mi a' bruidhinn ris?" Agus leugh e m' ainm bhon phàipear aige. Thuirt mi ris gur e mise sin, agus bha e troimhe-chèile dha-rìribh.

An-diugh a-nis, bha mi aig an sgoil shònraichte far a bheil mi ag obair. Bha mi nam shuidhe anns an t-seòmar teagaisg eadar dà leasan, a' sgrìobhadh rudeigin ann am faidhlichean nan sgoilearan, nuair a thàinig balach ùr a-steach. "A bheil mi ceart an-seo airson Laideann?" dh' fhaighnich e. "Tha", arsa mise agus cùm mi orm sgrìobhadh oir bha tìde gu leòr ann gus an tòisicheadh an leasan eile. Thòisich am balach na leabhraichean aige a chur air a' bhòrd agus gu h-obann dh' fhaighnich e: "Cò ris a tha an tìdsear coltach ma-tha? An e seòrsa seann bhò a th' innte?" - "Oh, chan eil fhios 'am...", thuirt mise, "ach tha i na suidhe air do bheulaibh co-dhiù." ;P Bha an nàire air gun teagamh.

Ach tha mise air mo shàrachadh le sin. Tha fios agam gu bheil coltas nas òige orm, ach chan eil mi choooo òg >:(

Dùrachdan na Nollaige :)

2007-12-21T23:26:00.000+01:00

Dealbh eile...

2007-07-18T23:03:00.000+02:00

... o chionn 's gu bheil mi airson a shealltainn do chuideigin.

Dealbhan às na h-Eileanan :D

2007-07-18T21:23:00.000+02:00

Fhuair mi cuid de na dealbhan agam bhon bhùth an-diugh :) Nach iad tha brèagha? (Seadh, tha mi caran pròiseil, hehe).
Seo an eilean Thiriodh...

Agus seo feadhainn eile à Bhatarsaigh + Barraigh:

"Wheelhouse" às an aois iarainn, agus an sealladh bhon t-sliabh sin...

Dùn ("broch") ann am Bhatarsaigh:

Agus an uair sin lean mi orm do na tràighean...:

Dathan nan eilean :D
Mona caran gòrach:
Thig tuilleadh, ach tha mi ro leisg an-dràsd' :-P

Turas a dh' Èirinn :)

2007-05-02T23:12:00.000+02:00

Thèid mi a dh' Èirinn a-màireach, o chionn 's gum bi mi a' gabhal pàirt ann an Strokestown Poetry Festival :D Cha chreid mi gum bi cothrom sam bith agam duais fhaighinn, ach chì mi... 'S e deireadh-seachdaine brèagha a bhitheas ann co-dhiù.

Rud inntinneach a mothaich mi, 's e gun tèid mi a dh' Èirinn a chiad turas an dearbh latha a fhuair Pàdraig Pearse (gaisgeach mòr dhomh nuair a bha mi nas òige ;)) bàs o chionn 101 bliadhna, às deidh an Easter Rising ann am Baile Átha Cliatha :o

Ruigidh mi Baile Átha Cliath anmoch san oidhche a-màireach, agus tha mi an dòchas gum faigh mi lorg air an osdal-òigridh ceart gu leòr. Di-Haoine bidh ùine agam dol air turas beag tron bhaile, agus an uair sin thèid mi air a' bhus a Roscommon.

Chan eil fhios agam am bi cothrom agam dol a-steach dhan eadar-lìon an-sin, ach chì mi. Bidh mi trang gu leòr co-dhiù. Tha mi a' dèanamh fiughar mhòr ris an fhèis, ach tha mi beagan diùid cuideachd ;)

2007-04-23T21:04:00.000+02:00

TURAS EARRAICH

air na frith-rathaidean gaineimh
eadar lochan is abhainn

a' ruith air fad a' ghàradh bruaich
mar gum b' e leinn-se a tha e

sìos do na cluaintean torrach
freumhan nan craobh a' cagar a-nios

agus tarsainn na h-aibhne
anns na tuinn, am bàta ìosal

dhachaigh a-nis tron choille bheithe

mo smuaintean a' sgaoileadh
mar blàthan nan craobh

do snodha-gàire air sgiathan eòin
tarsainn na dùthcha

fori fora forum... agus smuaintean eile

2007-04-15T22:01:00.000+02:00

Dè tha dol leis a' bhòrd-bràth Gàidhlig eadar-nàiseanta? Tha e air falbh o chionn beagan laithean - "server is busy". Carson a tha e trang? 8)

Bha mise an sàs le duilleag aig MySpace ;)
Bha mi daonnan dhen bheachd nach toigh leam MySpace, ach chunnaic mi daoine snog ann bho àm gu àm, agus chan urrainnear teachdaireachdan a sgrìobhadh gun a bhith na bhall.

Co-dhiù 's co-dheth, tha mi fhathast ag iarraidh an làrach-lìn agam fhèin a thogal a-rithist, 's ann dìreach gu bheil mi ag iarraidh làrach àlainn, mòr, le mòran rudan inntinneach, agus chan eil tìde agam idir... no tha mi dìreach leisg, is dòcha. Ach tòisichidh mi :)

Bha e gu math teth an-seo an-diugh, tha mi an dòchas gum bi e nas fhuaire a-rithist a dh' aithghearr. Chan eil mi ag iarraidh samhradh bhon Ghiblean dhan t-Sultain :o cha bhi m' inntinn ag obrachadh gu ceart.

Nise, chuir mi romham dàn Gàidhlig a leughadh gach feasgar. Feumaidh mi aideachadh gun do chuir mi sin romham aig toiseach na bliadhna mar-tha. Haha... bidh mi fhathast a' cur seachad cus ùine air an eadar-lìon, chan eil sin cho math. Bu chòir dhomh leabhraichean a sgrìobhadh :P

Earrach :-)

2007-03-26T20:18:00.000+02:00

Tha beusan no cleachdaidhean "prìobhaiteach" againn uile. Air mo shon-sa, tòisichidh an t-earrach nuair a thèid mi a-mach gun stocainnean a' chiad turas 'sa bhliadhna.
Bha e fuar, fuar, fuar na laithean sa chaidh, agus fliuch cuideachd. Ach an-diugh bha latha brèagha grianach ann, chaidh mi a snàmh tràth sa mhadainn, agus bha mi ann an deagh shunnd as-dèidh sin. Thàinig an GATH ùr anns a' phuist, agus leabhraichean sgoinneil bho charaid ann an Innis Tìle :-D San fheasgar bha dà sgoilear agam anns an sgoil-taic shìos sa bhaile, ach cha do nochd iad, agus mar sin shuidh mi ann an cafaidh snog agus dh' ith mi reòiteag mhòr :-P Bha mi nam shuidhe an-sin fon ghrèin mu uair a thìde, a' leughadh sgeulachdan le Aesop ann an Seann Ghrèugais. Tha mi toilichte gu bheil mi a' dèanamh fìor adhartais anns a' chànan sin, bha mi an còmhnaidh ag iarraidh a bhith comasach Seann Ghrèugais a leughadh coltach ri Laideann.
A' coiseachd dhachaigh bhon bhùth ann am beul na h-oidhche, agus an adhar fhathast blàth agus socair, thàinig seo nam inntinn:

osna mhaoth a' ghiblein òig
a' sìreadh corragan ri m' fhalt
tha a' ghaoth air leigeil às
na h-aodach gruamach geamhraidh

agus mise a' toirt fa-near
na bliadhna a' sgaoileadh
bidh an sàmhradh seo sgoinneil

(Seadh seadh, tha fios agam nach eil an Giblean ann fhathast, ach cha bhitheadh e cho snog le "osna mhaoth a' mhàirt òig :-P)

Tha e "oifigeal" a-nis :-)

2007-03-24T00:10:00.000+01:00

http://www.strokestownpoetry.org/gearrliosta07.html

Nach mi tha troimhe-chèile. Cha robh dùil agam idir gum bitheadh sin a' tachairt, ach fhuair mi an naidheachd seo o chionn dà sheachdain, agus a-nis tha i air an lìon cuideachd :)
Seadh, thèid mi a dh' Èireann aig toiseach a' Cheitein, agus chan eil fhios agam idir idir dè bhitheas a' tachairt an-sin. Tha an t-eagal orm ;) Uill, chan eil. Cha chreid mi gum buannaich mi. Ach tha an t-iongnadh orm gu dearbh nach eil dàn sam bith eile ann an Gàidhlig na h-Alba anns a' ghearr-liosta :o Chunnaic mi anns na bliadhnaichean sa chaidh gun do gabh daoine mar A P Caimbeul no Aonghas Dubh MacNeacail pàirt anns a' cho-fharpais sin, agus sin as aobhar nach robh dùil agam idir gum bitheadh dàn bhuam-sa (chuir mi trì no ceithir pìosan a-steach) anns an liosta.

Oh, agus tha sgeulachd goirid (no chan eil e choooo goirid ;)) bhuam ann an GATH 7. Hmmmm, is dòcha gum bu chòir dhomh crìoch a chur air an oilthigh agus imrich do dh' eilean beag air chòireigin ann an Alba agus a sgrìobhadh fad an latha?

Nach mise tha leisg...

2007-03-21T23:20:00.000+01:00

... na laithean seo. Bhitheadh mòran agam ri innse, bha mi anns an Fhraing aig deireadh a' Ghearrain, agus tha naidheachd eile no dhà ann cuideachd. Chan ann gu bheil mi uabhasach trang, chan eil fhios 'am. Tha saor-laithean aig an oilthigh, agus bu chòir dhomh mòran rudan a dhèanamh, ach chan eil mi ag iarraidh ach cadal agus coiseachd agus èisdeachd ri ceòl snog. Oh, bruidhinn air ceòl, thig an clàr ùr aig Julie Fowlis a dh' aithghearr! :D

a' feitheamh ris a' ghaillinn...

2007-01-18T13:38:00.000+01:00

Tha a' Ghearmailt às a rian... Thàinig an naidheachd an-dè 's a bhon-dè mar-tha, gun tigeadh stoirm mhòr a-nochd bhon Mhuir Lochlainn. Bidh sin cunnartach gu h-àraidh aig a' chladach agus anns na h-eileanan beaga air taobh tuath na Gearmailt, agus anns na beanntan cuideachd.
Seo an rabhadh oifigeal an-diugh:

Tha dearg a' ciallachd rabhadh aig ìre 2 agus pinc ìre 3 (as àirde). Tha mi a' tuigsinn gu bheil cunnart ann dha-rìribh aig a' chladach, bidh tuil mhòr ann a-nochd agus thathar ag ràdh nach bu chòir do na daoine dol a-mach a-nochd, agus tha fios agam bho caraidean ann an Hamburg gu bheil cead aca dol dhachaigh bhon obair aig meadhan-latha an-diugh... Chaidh sgoiltean agus cròileagan a dhùnadh cuideachd, agus chuir an Lufthansa stad air cuid itealain, agus chaidh rathaidean-iarainn a dhùnadh cuideachd o chionn 's gun do thuit craobhan air na rathaidean.

Ach anns an sgìre seo, chan eil e uabhasach stoirmeil fhathast. Co-dhiù, chuir dithis de na sgoilearan agam (clann ris an toir mi taic leis an obair-dhachaigh a.m.s.a.a.) fòn thugam nach tigeadh iad, oir bhitheadh sin "ro chunnartach". Deagh leisgeul, haha :p
Bha mi a' feitheamh ri sgoilear eile aig leth uair an-dèidh meadhan latha agus cha do nochd e, agus chuir a mhàthair fòn thugam o chionn beagan mhionaid airson innse dhomh gun robh e anns an sgoil nas fhaide (!) nas àbhaist dha - o chionn 's gun do rinn an sgoil co-dhùnadh gun dùin iad an sgoil agus gun cuir iad a' chlann dhachaigh a-rèir siostam air choireigin. Bha aig a' bhalach sin ri feitheamh gu math fada gus an robh cead aig a' chlas aige dol dhachaigh.
Agus chan eil stoirm sam bith ri fhaicinn an-seo! Tha am baile seo ann an gleann fada crom, cha bhi e uabhasach gaothach an-seo a-riamh. Bidh e nas miosa anns na bailtean beaga air na cnuic timcheall air a' bhaile mhòr...
Uill, chì sin dè eile bhitheas a' tachairt an-diugh.

beannachdan tèicneòlais pàirt II

2007-01-16T21:54:00.000+01:00

... no an can mi "mallachdan"? :P

Fhuair mi inneal stereo bho bhan-charaid an seachdain sa chaidh. Cha robh dhìth aice air, agus dh' fhaighnich i am bu toigh leam-sa a cheannachd... Bha inneal gu math sean agus leth-bhriste againn-se, agus bha mi a' fàs feargach leis co-dhiù. Dh' aontaich mi ma-tha agus thug an duine aig mo bhan-charaid an t-inneal thugainn 'sa chàr. Bha mi chooo toilichte. Cha d' fhuair mi e saor 's an asgaidh, ceart gu leòr, ach cha robh i ag iarraidh cus airgid agus tha an t-inneal spaideil fhèin.

Ach... thòisch an duine agam-sa a chur air dòigh (chan urrainn dhà fuireach leis an seòrsa rud seo, tha e coltach ri balach beag, feumaidh e fheuchainn 'sa bhad ;) ), agus cha tàinig fuaim às idir. Bha an t-eagal orm gum bitheadh rudeigin briste, ach chuala mi e ag obrachadh ceart gu leòr aig taigh mo bhan-charaid.
An uair sin fhuair sinn a-mach gun robh an t-inneal fhèin ag obrachadh, agus fhuair sinn fuaim tro headphones, ach cha tàinig dad às na loudspeakers. Bha an duine agam air a shàrachadh, agus cha do dh' fheuch sinn a-rithist e gus an-diugh. Dh' fheuch e sin is siud agus cha robh dad ag obair... bha mise brònach mar-tha o chionn 's gun robh mi a' smaoineachadh air an airgead, agus bha mi ag iarraidh an inneil seo, tha feum agam air...
Ach mu dheireadh thall mhothaich esan gun robh e air na uèirichean a cheangail dhan inneal ann an dòigh cheàrr - feumaidh mi ràdh gur bheil sin a' coimhead gu math neònach air cùl an inneil, agus cha robh e soilleir idir ciamar a chuireadh iad ann...

Co-dhiù... tha e ag obrachadh fìor mhath a-nis, agus tha mi ag èisdeachd ri Björk: Debut.
Abair clàr math, cha robh mi ag èisdeachd ri Björk o chionn greis... agus abair loudspeakers math dha-rìribh! :-)

seachdain ùr :-)

2007-01-08T12:06:00.000+01:00

Abair togail-inntinn a thig à leabhraichean ùra... Thàinig dà phacaid 'sa mhadainn an-diugh agus nach e toiseach seachdaine sgoinneil a tha seo? :-)
Tha mi a' faireachdainn mar gum bitheadh a' bhliadhna ùr air toiseachadh dha-rìribh a-nis, bha an seòmar comhraidh Gàidhlig làn daoine a-raoir, agus is dòcha gun tèid mi a Ghrionnlainn as t-samhradh.

(Chan eil sin ri leughadh gu furasda, ach tha am pacaid seo bhon bhùth leabhraichean "Atuagkat" ann an Nuuk, agus tha an comharra-phuist ag ràdh: Kalaallit Nunaat :-))

beannachdan tèicneòlais agus eile

2007-01-06T15:40:00.000+01:00

Tha gaol agam air an inneal MP3 agam! :-D Hmm, a bheil sibh dhen bheachd gu bheil seo neònach? Is dòcha gu bheil. Ach tha mi dìreach cho toilichte gu bheil an t-inneal beag seo agam, tha e uabhasach feumail. Fhuair mi e aig mo cho-latha breith bhon duine agam :-) Chuir mi mòoooran ciùil air, agus stuth eile cuideachd: faidhlean bho Radio nan Gaidheal agus faidhlean ann an cànanan eile... agus dhìochuimhnich mi dè gu eagarra a tha ann, o chionn 's nach bi mi ag èisdeachd riutha cho tric 's a bu toigh leam. An-dè bha mi nam shuidhe anns a' bhus agus ag èisdeachd ri siud is seo, agus thachair mi ri faidhle air leth inntinneach: Bha cuideigin (Aonghas MacNeacail, tha mi a' smaoineachadh) a' dèanamh agallamh ri Ruaraidh MacThòmais. Abair Gàidhlig àlainn a tha aige-san! Bu chòir dhomh a' bhàrdachd aige a leughadh a-rithists... agus nach eil film ann air a bheatha? Ar leam gun robh sin aig "Film Alba" ann am Bonn uaireigin...

Rud eile - inneal eile - tha càmara agam a-rithist, yay! :-D Nikon F301 a th' ann, tè a bha mi ag iarraidh o chionn fhada... Uill, bidh mòran daoine ag ràdh: Dè an sgudal seann-fhasanta a tha seo? Ach tha mise measail air dealbhan a thogal anns an t-seann dòigh! :-P
Tha mi an dòchas gum bi an càmara ceart gu leòr. Cha deach a chleachdadh o chionn fhada, ach bha na batteries ann fhathast... agus leig aon dhiubh a-mach an stuth, eeeeh, a tha ann (haha, duilich, chan eil fhios agam ciamar a chanas mi sin 'sa Ghàidhlig). Gu fortanach cha deach e a-steach dhan chàmara fhèin, cha deach e ach dhan bhocsa fon chàmara far a bheil na batteries - no tha mi an dòchas gur ann mar seo a tha e.
Togaidh mi dealbhan a-màireach agus chì mi...

Tha naidheachd eile agam: Tha seòmar comhraidh Gàidhlig ann a-rithist. Tha mi an dòchas gun còrd e ruibh :-)
Nise, feumaidh mise an seòladh lìn agam fhìn air ais fhathast (mona-nic-leoid.de). Chaidh rudeigin ceàrr leis o chionn greis, ach chan e mise as coireach. Na cuiribh earbsa ann an rudan mar sin bho "charaidean", gun chumhnant!

Co-dhiù, thàinig naidheachd bhrèagha eile thugam 'sa mhadainn an-diugh. Bha fios agam mar-tha gu bheil dàn no dhà bhuam anns an iris ùr aig GATH, ach cha robh dùil agam air seo: Dh' fhosgail mi litir, agus bha seic ann :o An toiseach cha robh mi a' tuigsinn dè bha ann idir... bha mi a' smaoineachadh gun robh e bho Chomhairle nan Leabhraichean agus gun robh mi air pàigheadh cus no rudeigin, ach an uair sin chunnaic mi am meud... bha an t-iongnadh orm gun teagamh! :-) Tha mi an dòchas gum faigh mi an t-airgead seo ceart gu leòr tron bhanca Ghearmailteach agam...
Agus chan fhaca mi an iris ùr seo aig GATH gu ruige seo idir, hehe. Bu chòir dhomh "fo-sgrìobhadh" a dhèanamh, tha mi a' smaoineachadh... Tha mi air ordugh a chur ri Comhairle nan Leabhraichean, ach thuirt iad nach eil an iris aca an-dràsda agus feumaidh mi feitheamh seachdain no dhà... ach chan eil mi buileach cinnteach a-nis an e sin an iris as ùire co-dhiù, hmmm. Chì mi :-) Agus tha mi a' sgrìobhadh rudan ùra cuideachd.

oidhcheannan ceò

2006-12-31T00:33:00.000+01:00

~ ~ ~

Ann am beul-aithris Gearmailteach, 's e "Rauhnächte" no "Rauchnächte" an t-ainm a tha air na h-oidhcheannan eadar Meadhan a' Gheamhraidh no àm na Nollaige agus "Latha nan triùr rìghrean" (6mh an Fhaoillteach). Tha iomadh sgeulachdan agus beusan co-cheangailte ris na laithean seo, bidh Wodan agus an "sealg fiadhaich" a-muigh anns a' ghaoith, agus bidh na h-aislingean 'san oidhche ag innse rudan a thig anns a' bhliadhna ùir - tha dà oidhche dheug ann airson targradh a dhèanamh air gach mìos na bliadhna a' tighinn. Ach a-rèir beachd eile tha trì oidhcheannan deug ann... àireamh sònraichte agus draoidheil gun teagamh :)
Tha e inntinneach, nam bheachd-sa, gu bheil cuid dhean bheul-aithris agus de na seann chleachdaidhean co-cheangailte ris na h-oidhcheannan seo gu math coltach ri beul-aithris agus cleachdaidhean Gaidhealach aig Oidhche Shamhna. Cha robh e ceadaichte obair-taighe mar nighe no figheadaireachd no snìomh a dhèanamh anns na laithean seo, oir bhitheadh a' bhan-dhia (Percht no Holle no ainmean eile anns na sgìrean eadar-dhealaichte) feargach, agus cha chuireadh na daoine an n-aodach air nighe a-mach airson tioramadh idir idir, o chionn 's gun tigheadh bàs do na daoine aig a bheil an aodach sin... agus tha sgeulachdan ann a tha caran coltach ris na sgeulachdan mun "bhean-nighe" leis an aodach fhuilteach aig an abhainn.
Tha dorsan dhan t-Saoghal Eile fosgailte anns na h-oidhcheannan sin, 's urrainn dha na beathaichean bruidhinn, agus bidh na mairbh a' gluasad tro saoghal nam beò, an "sealg fiadhaich" còmhla ri Wodan no Percht.
Ma thèid nighean no boireannach nach eil pòsda do chrois rathaid anns na h-oidhcheannan seo, is dòcha gum faic i an duine a bhitheas aice uaireigin - ach is dòcha gun tèid a goid leis na taibhsean bhon t-saoghail eile!

Rinn mi seo an-diugh :)

2006-11-19T18:26:00.000+01:00

Seo a' chiad turas a dh' fheuch mi mosaic a dhèanamh :) Bha dùil agam sin fheuchainn o chionn fhada... is toigh leam gu mòr na seann mhosaicean (eeeh, an e facal Gàidhlig a th' ann idir? :D) bho àm nan Romanach mar eisimpleir. Cheannaich mi am preasa beag no sgeilp seo aig ebay agus cha robh an uachdar cho snog idir, agus smaoinich mi, hmm, seo àite snog airson mosaic. Cha robh e uabhasach doirbh, agus chan eil mi buileach toilichte a-nis, ach tha e snog gu leòr agus feuchaidh mi rudeigin eile a dh' aithghearr...

foghar + àirneis-taighe ùr...

2006-11-11T22:44:00.000+01:00

Bha mi dìreach airson beagan dhealbhan sealltainn do charaidean... na gabhaibh dragh ;-)

(Chan eil am balla 's am mullach gorm dha-rìribh, 's ann geal a tha e, rinn dealan an càmara seo.)

Brighid + Athena :-) ...agus na sgeilpichean ùra agus tha iad làn leabhraichean a-rithist.

2006-11-11T22:39:00.000+01:00

Hmm, feumaidh mi sgeilp eile airson a h-uile clàraichean... ;-) Agus fraigh dhan dealbh (seann mhapa Breatainn is Èirinn), ach tha e cho mòr.

Sealladh bhon t-seòmar-suidhe dhan "leabhar-lann" ;-)

"Oisean an oifis" - an sgudal àbhaisteach... ach ann an sgeilpichean a-nis :-D
Agus fhuair mi monitor ùr bhon duine agam, tha mi choooo toilichte.

2006-11-11T22:36:00.000+01:00

Bha sinn ann an Alba...

2006-11-05T20:18:00.000+01:00

... agus sgrìobaidh mi tuilleadh air sin a dh' aithghearr (tha dùil againn blog eile a chruthachadh, le mòran dhealbhan is aithris bho na saor-laithean).

samhradh anmoch

2006-09-17T20:55:00.000+02:00

Tha an samhradh seachad, ach an seachdain seo tha e cho blàth a-rithist 's nach cuir mi orm ach lèine-T, briogais anairt aotrom is brògan clòtha no flip-flops fiù's nuair a thèid mi a-mach anmoch 'san oidhche. Tha na laithean a' fàs nas giorra a-rithist, agus bidh co-fhad-thràth an t-fhoghair ann a dh' aithghearr.
Tha mi rud beag feargach leam fhìn, chan eil fhios agam carson. Uaireannan bidh mi a' smaoineachadh gu bheil mi ro leisg, uaireannan bidh mi a' faireachdainn gu bheil mi ro thrang. Chan eil aobhar ann a bhith mi-thoilichte, agus chan eil feum ann am farmad... ach co-dhiù... :-)
Bidh mo chèile air falbh beagan laithean (obair), agus cheannaich mise rudan aig IKEA a thig Di-Màirt, agus tha mi an dòchas gun tèid agam ris a h-uile rud a chur air dòigh, airson iongnadh a chur air-san ;-) Tha esan chooooo leisg, bu toigh leis airneis-taighe ùr ach cha toigh leis dol dhan bhùth agus smaoineachadh dè na rudan as fheàrr a.m.s.a.a. Mar sin, bidh preasa-aodaich ùr ann nuair a thilleas e :-P

turas sgoinneil + foghar grianach

2006-09-11T09:35:00.000+02:00

Tha mi dìreach air tilleadh à Lietuva - abair turas inntinneach, abair dùthaich àlainn. Sgrìobhaidh mi tuilleadh nuair a bhitheas na dealbhan deiseil. Tha mi an dòchas gum bi iad math, cha robh ach camara beag sgudalach agam :/

Ràinig mi an taigh tràth 'sa mhadainn an-dè, chadail mi beagan uairean a thìde, agus an uair sin chaidh sinn a-mach dhan choille, agus dhan zoo :) Tha zoo snog ann anns a' bhaile seo, air sliabh chnuic le gleanntan beaga, le mòran chraobhan. Tha roinntean mòra aig na beathaichean, chan eil iad ann an cliabhan no taighean beaga. Is toigh leam sin. Bha latha àlainn againn gu dearbh, bha e grianach is blàth, ged a tha an samhradh seachad a-nis agus tha an adhar fuar 'sa mhadainn. Bha an zoo loma-làn daoine, gu h-àraidh le clann :)
A-nis, air ais dhan obair airson dà sheachdain trang, gus an tèid mi air turas eile (nàire orm, a' siubhal an-siud 's an-seo fad an t-samhraidh ;)) - a dh' Alba a-rithist, dhan Eilean Sgitheanach.

ronia

2006-09-03T23:33:00.000+02:00

Nach mi tha toilichte :-) Bha mi a' coimhead air làrach-lìn Lietuvos radija ir televizija (radio + telebhisean ann an Lithuania), agus mhothaich mi gun robh iad air "Ronja" le Astrid Lindgren a chraoladh mar phrògram chloinne an seachdain sa chaidh agus an seachdain roimhe. Seo an leabhar a b' fheàrr leam dha-riribh nuair a bha mi nam nighean bheag, leugh mi e iomadh turas agus tha mi fhathast a' smaoineachadh gur e leabhar sgoinneil is cudthromach a th' ann. Tha mi air a leughadh ann an Suainis (mar a chaidh a sgrìobhadh le Astrid Lindgren) cuideachd, agus bu toigh leam fhaicinn 'sa Ghàidhlig... ach sin sgeul eile ;-) Co-dhiù, dè rinn mi ach am prògram ud a shàbhaladh dhan choimpiutair agam, agus tha mi ag èisdeachd ris fad an fheasgair. Tha e glè shnog, mar dhealbh-chluiche, le guthan eadar-dhealaichte agus fuaimnean eile agus beagan chiùil an-siud is an-seo, agus bha iongnadh orm cia mheud a bha mi a' tuigsinn gu dearbh. Gun teagamh, tha mi gu math eòlach air an sgeul - bha mi fiù 's a' mothachadh càit an do dh' atharraich is gheàrr iad i ;-) Tha guth na h-ighne bige cho milis. Cuiridh mi sin air a' chluicheadair MP3 agam... agus tha sin dìreach feumail airson brosnachadh a chur thugam fhèin, o chionn 's gun tèid mi a Liotuainia Di-Màirt... agus mu dheireadh thall tha mi gu bhith a' creidsinn gum bi mi ceart gu leòr leis a' chànan an-sin ;-)

leabhar ùr, oidhche chiùin, ceòl àlainn, agus fìon dearg à gloinne uisge-beatha

2006-08-19T00:02:00.000+02:00

Sin mar a tha e. Tha na gloinneanan fhìon uile salach, agus bha mi ro leisg gus an glanadh. Coma leam-sa. Tha am fìon ceart gu leòr, La cuvée mythique, agus cheannaich mi e o chionn 's gun do chòrd an dealbh leis a' chailleach-oidhche air a' bhotail rium ;-) Slàinte mhath, agus tha an deireadh-seachdaine ann, ha!

Ràinig leabhar-ionnsachaidh Lithuanian an-diugh - mu dheireadh thall, bha mi a' feitheamh ris choooo fada. Uill, 5 laithean, leis an fhìrinn innse. Cheannaich mi air ebay e, ach bha mi ga iarraidh o chionn fhada. 'S ann dìreach gu bheil e uabhasach daor, leis na clàran is tèipichean co-dhiù. Ach tha e math. Tha mi air Lithuanian gu leòr ionnsachadh le seann leabhar aig an oilthigh, ach cha robh stuth airson èisdeachd ann, agus sin an rud as cudthromaiche. Chan eil mòran ghràmair anns an leabhar ùr, no tha mi eòlach air co-dhiù, ach tha e uabhasach feumail airson comhradh simplidh, an cànan mar a tha e ga bhruidhinn na laithean seo. Sin na bha a dhìth orm.

Bha mi a' faireachdainn rud beag fogharach (hehe, chruthaich mi facal ùr) an-diugh agus thòisich mi ri ceòl freagarrach a lorg... Tha mi ag èisdeachd ri Mazzy Star, Cocteau Twins, Slowdive, Faith and Disease, Merry November, Kirlian Camera, agus rudan mar sin fad an fheasgair :-)
An rud a tha a' cur dragh orm - chan urrainn dhomh èisdeachd ri ceòl agus ri clàr chànain aig an aon àm, grrr... ;-) Bhitheadh inntinn stereo glè fheumail gu dearbh.

dè tha dol?

2006-08-17T09:46:00.000+02:00

Uill, tha mi fhathast a' faireachdainn gum bi mi a' ruith agus uabhasach trang fad an latha. Bha mòran rudan agam ri dhèanamh as-dèidh dhomh tilleadh à Alba, agus chan eil mi deiseil leotha fhathast. Ach co-dhiù, tha an t-sìde nas fheàrr, tha an teas air falbh, agus tha mi a' faireachdainn anail an fhoghair anns an adhar 'sa mhadainn.
Aig toiseach an t-Sultainn thèid mi a Lithuania airson seachdain, agus tha an t-eagal orm rud beag, hehe ;-) Uill, chan eil dha-riribh, ach bidh an turas glè inntinneach, agus tha mi an dòchas gun tèid agam ri beagan Lithuanian a bhruidhinn... Bidh mi a' coinneachadh ri daoine air a bheil mi eòlach bhon eadar-lìon.

Sgrìobh mi sgeulachd eile 'sa Ghàidhlig, a bhitheas ri leughadh ann an GATH 6. Tha mi ag iarraidh mòran rudan eile a sgrìobhadh, ach tha leisgeulan gu leòr agam... ;-)

obair is oidhcheanan fada

2006-08-07T09:05:00.000+02:00

Ceart, thill mi à Alba agus bha mi uabhasach trang a-rithist an dearbh latha. Bha sgoilearan gu leòr agam, deugairean a nì deuchainn shònraichte a-nis aig toiseach an t-semester ùr o chionn 's nach robh iad math gu leòr anns an t-semester 'sa chaidh, agus mur a bheil iad airson dol do chlas nas ìsle, feumaidh iad an deuchainn seo a dhèanamh.
Chuir mise cuideachadh do cheathrar, triùir nighean agus balach, tro saor-laithean an t-samhraidh, le ullachadh airson na deuchainn seo.

Bha nighean ann an clas 8 (clas 2 àrd-sgoil) ann, a nì an deuchainn ann an Laideann an-diugh. Bha i air Laideann ionnsachadh dà bhliadhna, ach cha robh i air tuigsinn dad sam bith! Mar sin, bha 6 seachdainean againn (agus mise ann an Alba dà sheachdain ann am meadhan nan saor-laithean sgoile) gus sin atharrachadh. Rinn sinn obair mhòr, nam bheachd-sa, bha an nighean fhèin uabhasach trang, agus tha mi an dòchas gun tèid an deuchainn aice an-diugh gu math, oir bha an t-eagal mòr oirre.

Bha nighean eile agam, ann an clas 10, a bha airson deuchainn ann am matamataics a dhèanamh, gus an ceum aice (fàgaidh i an sgoil) a chur am feabhas. Cha robh i cho dona idir, bha i air a bhith tinn gu tric anns an t-semester sa chaidh agus mar sin bha rud no dhà ann nach do thuig i math gu leòr san sgoil agus sgrìobh i deuchainnean dona ma-tha.

Bha balach ann le trioblaid leis a' chuid Ghearmailtis, o chionn 's gu bheil a phàrantan às na h-Innseachan, bha e glè shnog is trang gu leòr. Agus bha nighean eile ann a bha ag iarraidh deuchainn a dhèanamh ann am Beurla is Fraingis - cha b' urrainn dhomh a cuideachadh mòran le Fraingis (ged a chuir mi rudan dhi airson gràmar a chur an cleachdadh) ach chuidich mi le Beurla i agus tha mi cinnteach gun dèan i gu math, ged a tha e doirbh gu leòr an deuchainn shònraichte seo a dhèanamh ann an dà chuspair!

Mar sin, tha mi an dòchas gun cuir iad uile fòn thugam an-diugh no a-màireach agus gun innis iad dhomh gun deach a h-uile rud gu math. Bidh mi moiteil asta ma-tha :)

Bha mi caran proiseil leam fhìn cuideachd anns na laithean sa chaidh - tha mi air mòran rudan a sgrìobhadh, aiste no dhà airson an oilthigh agus rudan air mo shon fhèin, chuir mi crìoch air sgeulachd agus thòisich mi tè eile, rinn mi rannsachadh air cuspair no dhà agus thòisich mi sin a sgrìobhadh... an aon trioblaid a th' ann, bidh a h-uile rud seo a' tachairt ann am meadhan na h-oidhche, agus chan fhaigh mi cadal gu leòr idir ;)
Is toigh leam sgrìobhadh 'san oidhche! Is toigh leam gu mòr a bhith nam shuidhe aig a' choimpiutair gu math fhada, can gu meadhan-oidhche, agus èisdeachd ri ceòl, cabadaich ri caraidean air an eadar-lìon, agus an uair sin, uaireigin as-dèidh meadhan-oidhche, bidh mi a' faireachdainn mar gum bitheadh rudeigin a' tionndadh no a' fosgladh, agus bidh beachdan math agam, beachdan nach robh agam roimhe, thig na faclan gu furasda is gu luath, cuiridh mi crìoch air rudan a bha air a' choimpiutair agam ùine fhada, agus mar sin air adhart. Feumaidh mi ceòl àrd neònach agus seòclaid no briosgaidean no rudeigin eile blàsda mi-fhallain le sin, uaireannan bidh gloinne fìona dearb agam cuideachd ;)
A-raoir bha mi nam shuidhe mar seo gu bhith gu trì sa mhadainn. Mu dheireadh thall thàinig an duine agam a-steach dhan t-seòmar agam, bha e air a bhith na chadal, agus thuirt e: Nach tu tha craicte! An e taibhse na h-oidhche a th' annad?
Agus bha agam ri èirigh eadar 7 is 8 uairean an-diugh, airson fòn a chur ris an ceann-àrd agam aig an sgoil choimpiutair agus faighinn a-mach cuin a bhitheas mi ag obair.

beagan dhealbhan às na h-eileanan siar :)

2006-07-26T10:14:00.000+02:00

Mu dheireadh thall tha na dealbhan ag obrachadh an-seo a-rithist. Seo sealladh no dhà bhon eilean Bhearnaraigh (Uibhist a Tuath) far an do chuir mi seachad deireadh-seachdaine brèagha, fad 's a bha mi air a' Ghaidhealtachd airson cùrsa Gàidhlig agus co-labhairt. Innsidh mi dhuibh tuilleadh air na tachartasan seo a dh' aithghearr. Tha mi dìreach air tilleadh dhachaigh agus tha mi gu math trang a-rithist leis an obair agam.

teas

2006-07-04T16:20:00.000+02:00

Seo mar a bha e tràth 'san fheasgar an-diugh :P 37 no 38°C, agus cha tig mòran grian dhan oisean sin idir.
Agus feumaidh mi obair fad an latha agus siubhal tron bhaile air a' bhus, cha toigh leam sin idir. Tha mi cho toilichte gun tèid mi a dh' Alba Di-Sathairne! :D

a' ghearmailt is am ball-coise ;-)

2006-06-30T20:41:00.000+02:00

Bha mi nam shuidhe san oifis san fheasgar an-diugh fad 's a bha a' Ghearmailt a' cluich an-aghaidh Argentina, agus leis an fhìrinn bha mi gu math coma air a h-uile rud an toiseach, ach bha e gu math èibhinn an uair sin... 's e taigh mòr a th' ann agus tha an oifis air a' chiad làr agus mòran fhlat os chionn, agus gun teagamh bha na h-uinneagan uile fosgailte leis an deagh shìde a bh' ann, agus chuala mi na daoine ag èigheachd agus na h-innealan telebhisein gu h-àrd air feadh na taighe ;-)
Ach cha robh mòran a' dol an toiseach... feumaidh gun robh an dà sgioba rud beag leisg no chan eil fhios agam. Bha an oifis fhèin cho sàmhach, bha gu bhith a h-uile duine air falbh dhan taigh-seinnse airson coimhead air a' gheama an-sin. Bho àm gu àm ruith duine air choireigin seachad air an seòmar agam, agus mar sin chuala mi nach robh ach bàir aig gach sgioba airson ùine fhada...
Co-dhiù, mu 7 uairean rinn mi co-dhùnadh gun rachainn don bhùth airson biadh a cheannachd... abair deagh bheachd! Nuair a chaidh mi sìos bha an "ùine air barrachd" dìreach air toiseachadh, agus bha na sràidean gu tùr sàmhach, agus nuair a ràinig mi a' bhùth mhòr (as àbhaist a bhith uabhasach trang aig an àm sin dhen latha) cha robh duine sam bith ann, agus bha an luchd-obrach uile a' coimhead air telebhisean mòr ri taobh an dorais ;-)
Agus dìreach an-dèidh dhomh dol a-mach a-rithist - bha an geama crìochnaichte agus thòisich am fuaim, agus mar sin bha fios agam air a' bhuil.

An-dràsda fhèin tha am partaidh a' dol, tha iomadh daoine a' draibheadh mun cuairt a' bhaile le bratachan agus fuaim agus ann an deagh shunnd :-D Seo beagan dealbhan, chan eil iad uabhasach math leis a' chamara sgudalach agam, ach seo na tha a' dol mun cuairt na taighe agam an-dràsda (agus cha robh mi shìos ann am meadhan a' bhaile idir, ach tha fuaim mhòr a' tighinn a-nìos an-sin.

meadhan samhraidh

2006-06-24T22:51:00.000+02:00

Bha mi nam shuidhe air a' bhalcon, ag òl fìon dearg à California agus a' faireachdainn cho toilichte is sunndach ann am blàths is samhchair ann oidhche. Nach iongantach gu bheil e cho blàth aig beul na h-oidhche? Is toigh leam oidhcheanan samhraidh... is beag orm teas meadhan latha, a' ghrian gheur, ach is toigh leam suidhe no coiseachd a-muigh san oidhche aig an àm seo dhen bhliadhna.
Cheannaich mi neòinean-grèine an-dè, tha e fhathast beag, agus tha mi an dòchas gum bi e a' faireachdainn gu sunndach air a' bhalcon agam cuideachd. Bha e beagan lag an-diugh ach tha mi a' smaoineachadh gu bheil poit nas motha a dhìth air.
Chuir mi cearcall chlachan beaga air an làr agus thuirt mi hallò do bhan-dhia na h-oidhche. Is dòcha gu bheil an deoch orm a-nochd ach tha mi a' faireachdainn cho ciùin is sunndach is dòchasach :) Tha a h-uile rud a' fàs gu math an-dràsda. Beannachd oirbh :)

sealladh grod

2006-06-16T13:14:00.000+02:00

Thèid taigh ùr a thogal air beulaibh an taigh againne air an taobh eile an rathaid. Tha sinn a' fuireach ann am meadhan a' bhaile, ach cha robh an sealladh cho dona roimhe. Cha robh taigh ann idir anns an àite sin, cha robh ann ach bothanan is garaidsean. A-nis, tha an taigh sin a' fàs agus a' fàs. Cha tig solas gu leòr a-steach dhan t-seòmar suidhe againn a-nis :-/
Agus tha sin beagan eagallach, tha an taigh ùr cho faisg air an taigh againn agus ma tha iad ag obair leis a' chrann-togalach bidh na rudan a' gluasad dìreach air mo bheulaibh (tha am bòrd agus an coimpiutair agam dìreach ri thaobh na h-uinneige).

teas

2006-06-13T19:34:00.000+02:00

Gaaaaaaah... tha e cho blàth. Chan eil mi ag iarraidh gluasad idir :-/ Tha mi an dòchas nach màir e mar sin fada. Bu toigh leam a bhith anns na h-Eileanan Siar an-dràsda, aig a' chladach, anns a' ghaoith :-)

stad an gealaich?

2006-06-11T15:14:00.000+02:00

Ciamar a chanas mi lunar standstill 'sa Ghàidhlig? ^^
Am faca sibh an gealach làn a-raoir? Bha e glè h-ìosal os cionn nan cnoc an-seo. Cha bhi e mar sin gu tric, cha bhi sin a' tachairt ach as-dèidh 18 bliadhna.

Chuala mi gum bi mòran daoine aig na tursachan Calanais an deireadh-seachdaine seo. Bidh an gealach os cionn Cailleach na Mointich (na beanntan a tha beagan coltach ri tè na laighe) agus bidh e glè fhaisg air na tursachan.
Bidh an gealach cho ìosal ann an oidhche no dhà eile am bliadhna. Agus an uair sin cha bhi a-rithist gu 2025.

Bha e glè mhòr agus soilleir agus làidir a-raoir. Cha robh cuimhne agam air an lunar standstill gus an-dè, ged a leugh mi mu dheidhinn sin roimhe agus bha fios agam gum bi e a' tachairt 2006. Ach dhìochuimhnich mi e a-rithist... An seachdain seo, ge-tà, bha mi a' faireachdainn gum bi an gealach làn a' tighinn uabhasach làidir, bha sunnd neònach toilichte orm (obh obh, nach mise a tha rud beag craicte ;-) ).
A-raoir bha sinn a' bruidhinn air a' chuspair sin aig cèilidh, agus an uair sin nuair a ràinig mi dhachaigh aig leth uair an-dèidh dà sa mhadainn chunnaic mi an gealach cho mhòr agus soilleir os cionn nan cnoc agus bha mi nam sheasamh an-sin airson greis, ag èisdeachd ri ceòl gu h-àrd air na headphones.

Leugh mi gum bi an gealach cho ìosal a-rithist aig 9mh/10mh latha an t-Iuchair, agus thèid mi a dh' Alba co-dhiù an 8mh. Tha mi a' smaoineachadh a-nis an tèid agam air dol a Leòdhais an deireadh-seachdaine sin. Ahahaha... obh obh, bhitheadh sin craicte gu dearbh, agus chan eil mi buileach cinnteach am bu toigh leam a bhith ann an Calanais còmhla ri mìltean daoine esoteric... hmm, ach bu toigh leam an gealach fhaicinn an-sin gu dearbh. Chì mi :-)

hahaha, ball-coise

2006-06-09T22:25:00.000+02:00

Feumaidh gum bi sibh uile a' smaoineachadh gu bheil mi beagan neònach (ach uill, seallaibh air ainm na duilleige seo :-P ) - Cupa na Cruinne a' toiseachadh 'sa Ghearmailt an-diugh agus a' chiad geam seachad, agus chan eil dad ri leughadh an-seo ach sgeulachd mu chonsairt neònach...
Uill, a-rèir coltais bhuannaich a' Ghearmailt... agus tha an deoch air a h-uile duine. Leis an fhìrinn innse, tha mi gu math coma mu dheidhinn Cupa na Cruinne fhèin - ach is beag orm na mìltean daoine anns na bailtean agus air na trèanaichean, na daoine air mhisg, na daoine mi-mhodhail, fuaimneach, na stèiseanan loma-làn, salach, na trèanaichean fadalach, gaaaaah :-P Tha mi a' fuireach faisg air Cologne agus tha mòran daoine air tighinn an-sin, bidh cuid gheamaichean a' tachairt anns a' bhaile sin. Agus feumaidh mise dol troimhe dà no trì tursan 'san seachdain nuair a bhitheas mi a' siubhal dhan oilthigh ann am Bonn.

TOOL

2006-06-09T17:19:00.000+02:00

Woohoo, bha sinn aig cuirm-ciùil sgoinneil a-raoir, choimhead sinn air TOOL a' cluich ann an Düsseldorf. Seo comhlann ròc uabhasach inntinneach, is toigh leam gu mòr iad, agus tha mo chèile uabhasach measail orra. Tha iad gun samhail, chan eil e furasda mìneachadh dè an seòrsa ciùil a nì iad. Tha e làidir is domhainn is fiadhaich. Is toigh leam gu h-àraidh an album "Lateralus" aca, ach tha am fear ùr "10.000 days" glè mhath cuideachd.
Bha an consairt math dha-riribh, ged a bha e beagan goirid! Bha na ticeadan gu math daor aig 38 € no rudeigin, agus cha do chluich iad ach ach uair gu leth a thìde, mas math mo chuimhne. Ach bha sin fìor mhath. Bha mòran charaidean againn ann cuideachd agus bha sinn uile ann an deagh shunnd. 'S ann anns a' Philipshalle a bha an cuirm-ciùil, agus mar a bhitheas fios aig cuid, tha e gu math mòr, agus bha e loma-làn. Bha mìltean daoine ann.
Is toigh leam gu h-àraidh an duine a tha a' cluich nan drumaichean aca, Danny Carey. Tha e uabhasach math, agus tha dòigh shònraichte aige, bidh e a' cleachdadh rudan mar tablas (drumaichean innseach) còmhla ris na drumaichean àbhaisteach. Agus tha e àlainn, hehe... uill, ann an dòigh co-dhiù.

dealbh gòrach ;-)

2006-06-06T23:19:00.000+02:00

cothrom èisdeachd

2006-05-26T10:50:00.000+02:00

Thachair mi ri rudeigin snog an-seo: http://www.gaelstream.ca Tha mòran stuth inntinneach ann. Is toigh leam na sgeulachdan :-)

Chan eil mòran naidheachd eile agam. Bu toigh leam cuid dhealbhan a chur ann an-seo a-rithist, ach chan eil dad sam bith inntinneach agam... Bu chòir dhomh am film bho Ibiza (a tha anns a' chàmara fhathast) a thoirt dhan bhùth mu dheireadh thall, gum faigh mi na dealbhan sin... Tha mi an dòchas gum bi cuid dhiubh snog :-)

aimsir neònach

2006-05-22T08:35:00.000+02:00

Tàirneanach is dealanach 'sa mhadainn! Abair toiseach seachdaine ;-) Gah, cha toigh leam dol dhan oilthigh ann an sìde mar sin, ach co-dhiù... Bha mi gu math toilichte leis an deireadh-seachdaine, cha robh mi ro thrang, ach rinn mi rud feumail no dhà airson an oilthigh agus bha sinn a' coiseachd cuideachd...
An seachdain 'sa chaidh bha òraidean inntinneach ann aig an oilthigh, ghabh an t-ollamh Anders Ahlquist òraid air deasachadh teacsan Seann Ghàidhlig Di-Ardaoin, agus bha buth-obrach le òraidean eile air deasachadh teacsan bho na Meadhan Aoisean ann Di-Sathairne. Bha sin èibhinn, cha robh ach triùir oileanach ann, ged a bha ollaimh à iomadh roinn a' bruidhinn, agus an triùir againn uile às an roinn Ceiltis. Feumaidh gun robh an t-ollamh againne caran pròiseil, bhitheadh e a' bruidhinn ruinn gu tric eadar nan òraidean, agus ann an dòigh gu math laghach nach àbhaist dha, haha.
Och, nach feumail a tha a' Ghàidhlig airson gobaireachd ;-)

chan eil dad ri fhaicinn an-seo :-P

2006-05-19T20:51:00.000+02:00

Bha dealbh gòrach ann an-seo ach tha e air falbh ;-) Bha mi dìreach ag iarraidh mo bhrògan ùra a a shealltainn ri mo bhan-charaid Janni... cha robh sin cho cudthromach.

chan eil mòran naidheachd ann...

2006-05-17T08:21:00.000+02:00

Bha dùil agam sgeulachd no dhà a sgrìobhadh an-seo, ach leis an fhìrinn, tha mi ro leisg ;-) Cha toigh leam suidhe aig a' choimpiutair cho tric na laithean seo. Is fheàrr leam leabhraichean snog a leughadh as-dèidh latha fada...

dùrachdan à eivissa :-)

2006-05-04T20:31:00.000+02:00

tha mi a´sgrìobhadh thugaibh a-nochd bhon eilean seo anns a´mhuir mheadhanach. bidh mi an-seo gu di-domhnaich còmhla ri mo chèile a tha an-seo airson coinneamh le daoine bhon chompanaidh.
bha dùil agam gum bitheadh e gu math grianach is blàth an-seo, ach nuair a ràinig sinn bha an t-eilean fo sgòth, agus beagan uisge ann. an-dràsda san fheasgar tha a´mhuir glas is fiadhaich, na tonnan a´ruith mar eich gheala... cho brèagha! :-)
grrr, chan eil an coimpiutair seo uabhasach math. sgrìobhaidh mi tuilleadh a-màireach.

tha mi ag èisdeachd...

2006-04-30T21:52:00.000+02:00

... ri SONIC YOUTH fad an latha, an deireadh-seachdaine neònach seo.

tha mi air a bhith measail air a' chòmhlann seo ùine fhada... barrachd na dàrna leth mo bheatha gu ruige seo, hehe... uaireigin feumaidh mi rudeigin a sgrìobhadh mun deidhinn 'sa ghàidhlig, ach cha dèan mi sin an-dràsda. a bheil duine sam bith eòlach orra?

an-diugh, eadar bròn, aimhreit, grian is cuimhne, tha mi ag èisdeachd ris na clàran "a thousand leaves" agus "nyc ghosts and flowers", agus tha gu h-àraidh an t-òrain "hoarfrost" a' còrdadh rium.

i put my feet deep in the tracks that you made
walked behind you off into the wood
we'll know where when we get there you said
and we both knew we would ...

bu toigh leam sin a chur 'sa ghàidhlig, ach chan eil mi cho cinnteach. cha robh mi a-riamh math air eadar-theangachadh, ann an cànan sam bith ;-)

brònach

2006-04-29T20:08:00.000+02:00

an seachdain seo fhuair sinn droch naidheachd.
bidh mo chèile 's mi-fhìn gu tric air fòrum neònach èibhinn mu cheòl ròc agus rudan eile... tha sinn eòlach air mòran daoine an-sin, tha cuid dhe na daoine air a' fòrum sin nan deagh charaidean agus ged a tha e uabhasach craicte 's e àite cairdeil laghach a th' ann cuideachd.
nis, cuid laithean air ais chuala sin gun do chaochail duine bhon fòrum sin. chuir e crìoch air a bheatha fhèin. cha robh mise eòlach air dha-rìribh, ach co-dhiù. bha mòran chòmhraidh shnog èibhinn againn, bhitheadh sinn a' cabadaich mu cheòl, bhitheadh e ag èisdeachd ri mòran chòmhlainn a tha a' còrdadh rium-sa cuideachd. agus cha robh mi a-riamh a' smaoineachadh gun robh e brònach no gun robh trioblaid mòr aige leis a bheatha.
tha sin cho eagallach. bidh mi air an eadar-lìon gu tric agus tha mi "eòlach" air mòran daoine dìreach tron loidhne... bidh mi a' leughadh bhuapa gu bhith gach latha, ach a dh' aindeoin sin chan eil fhios agam cò iad dha-rìribh, ciamar a tha cùisean aca, dè tha dol 'sa bheatha aca. 's urrainn do chuideigin smilies a sgrìobhadh ann am fòrum no seòmar-chòmhraidh ged a tha deòir na shùil.
tha sin gam chur glè bhrònach an-dràsda, ged nach robh mi eòlach gu math air a' bhalach sin.
a charaidean, toiribh sùil air ur caraidean. beannachd leibh uile.
~

innis tilis

2006-04-18T18:33:00.000+02:00

a bheil sibh airson beagan innis tilis ionnsachadh? is toigh leam gu mòr an cùrsa seo! tha e saor 's an asgaidh agus tha e dìreach sgoinneil, dèanta ann an dòigh shunndach, ghlic, sgiobalta - tha an dreach dìreach beagan troimhe-chèile an toiseach, cha robh mi cho cinnteach ciamar a thèid mi tro na leasanan, ach tha sin ceart gu leòr a-nis (tha aonadan ann agus leasanan anns gach aonad, agus duilleagan anns gach leasan, agus tha uinneagan beaga le còmhradh anns gach duilleag, obh obh ;-)). co-dhiù, faodar èisdeachd ris a h-uile rud agus chan eil ach beagan mìneachadh gràmàir ann, tha sin dìreach math dhomh-sa, oir tha gràmar gu leòr anns na leabhraichean agam. is toigh leam èisdeachd ris na còmhraidh agus is toigh leam na geamaichean beaga a chluich cuideachd. tha sin dìreach feumail airson beagan mionaidean aig an obair :-)

tha mi ann an deagh shunnd

2006-04-17T17:01:00.000+02:00

a bheil sibh eòlach air an làrach-lìn seo? http://www.mylanguageexchange.com 's e làrach air leth feumail a th' ann ma tha sibh a' lorg caraidean airson còmhradh ann an cànanan cèin air an eadar-lìon. bha mi air clàradh an-sin ùine fhada, ach an toiseach cha robh mi ag iarraidh airgead a phàigeadh. tha an làrach-lìn fhèin saor 'sa an-asgaidh, faodar clàradh is profile a dhèanamh, agus bidh sin ri fhaicinn airson daoine eile. ach ma tha thu fhèin airson sgrìobhadh ri daoine, feumaidh tu $6 a phàigheadh airson mìos. chan eil sin cho dona, agus faodaidh tu an seòladh post-d àbhaisteach agad a chur riutha an uair sin no seòladh skype no icq. ach bha mi daonnan ro leisg airson pàigheadh, oir chan eil càirt creidis agam agus b' fheudhar dhomh pàigheadh tro western union. ach o chionn goirid tha cunntas paypal agam agus chunnaic mi gur urrainn dhomh pàigheadh tron chunntas seo cuideachd. mar sin, tha mi nam bhall "òir" an-dràsda, agus an deireadh-seachdaine thòisich mi teachdaireachdan a sgrìobhadh gu mòoooran daoine. tha sin dìreach sgoinneil, tha daoine gu leòr ann a tha ag iarraidh an cuid ghearmailtis a chleachdadh no a leasachadh, agus tha cànanan aca a tha inntinneach dhomh-sa, mar lithuanian, nirribhis, innis tilis. lorg mi daoine a tha ag iarraidh gàidhlig ionnsachadh cuideachd, no mar eisimpleir daoine aig a bheil gàidhlig na h-èirinn agus tha iad airson gàidhlig albannach ionnsachadh cuideachd. sgrìobh cuid dhe na daoine air ais thugam mar-tha agus bha mi a' bruidhinn ri tè no dithis air icq.
ma tha ùidh aig cuideigin anns an rud seo, agus mura bheil sibh airson pàigheadh, seo beachd bhuam: sgrìobhaibh thugam ma lorgas sibh cuideigin air an làrach-lìn ud a tha inntinneach dhuibh. cuiridh mise teachdaireachd thuige no thuice ma-tha agus cuiridh mi an seòladh post-d no ainm skype agaibhse ann. 's urrainn dhomh 400 teachdaireachdan a chur 'sa mhìos seo airson nan $6 a phàigh mi, agus chan eil mise ag iarraidh 400 caraidean ;-)

deireadh-seachdaine fada

2006-04-15T14:28:00.000+02:00

tha mi fhathast a' faireachdainn mar gum bitheadh saor-laithean agam, ged a tha an semester ùr aig an oilthigh air toiseachadh. ach thòisich saor-laithean na caisge aig na sgoiltean aig an aon àm, agus tha sin a' ciallachadh nach eil mi ag obair mar as àbhaist. tha cuid sgoilearan agam, ach bidh mi ag obair leotha 'sa mhadainn, mar sin bidh mi saor gach latha bho mheadhan-latha.
cha dèan mi mòran aig an oilthigh an semester seo. tha clas inntinneach mu teacsan lagha seann ghàidhlig ann, agus bidh mi a' leantainn orm leis na cànanan eile gun teagamh. nàire orm, bu chòir dhomh mo chuid nirribhis agus innis tilis a leasachadh gu dearbh. tha leughadh ceart gu leòr, ach cha tuig mi facal ma tha cuideigin a' bruidhinn. chan eil sin math idir. thòisich mi fraingis ionnsachadh cuideachd - bha mi daonnan ag iarraidh gum bitheadh an cànan seo agam, ach cha robh mi ag iarraidh ionnsachadh. chan eil e doirbh idir, bidh mi a' tuigsinn gu bhith a h-uile rud ann an teacsa sgrìobhte àbhaisteach (bha 7 bliadhna dhe laidinn agam aig an sgoil, tha sin feumail gu dearbh), ach chan urrainn dhomh dad sam bith a ràdh 'sa fhraingis, agus cha bhi mi a' tuigsinn nan daoine nas motha. tha cuimhne agam air a' chiad turas (agus an aon turas) a bha mi ann am paris, bha sin cho eagallach... abair baile brèagha, ach cha robh na daoine comasach no deonach beurla a bhruidhinn agus bha mi a' faireachdainn dìreach air chall. oidhche a bha siud, thàinig uisge tro mhullach an t-seòmar anns an taigh-òsda againn agus cha mhòr nach b' urrainn dhomh mìneachadh don duine aig an reception dè tha dol agus am b' urrainn dha tighinn suas is coimhead air. feumaidh gun robh e a' smaoineachadh gun robh sinne - dithis nighean òga - ag iarraidh air tighinn dhan t-seòmar againn airson rudan neònach aig meadhan na h-oidhche.
co-dhiù... nach eil e iongantach gu bheil luchd-ionnsachaidh na gàidhlig às an fhraing a' nochdadh air a' bhòrd-bràth eadar-nàiseanta dìreach na laithean seo? abair cothrom math, feuchaidh mi ri beagan fhraingis is gàidhlig a bhruidhinn riutha.

bha dùil agam 's aig mo chèile coinneachadh ri caraidean an deireadh-seachdaine seo, ach tha mo chèile 'san leabaidh le cnatan no casadaich agus chan eil e math idir.
uill, deagh chothrom airson fuireach 'san taigh agus sgioblachadh a h-uile sgudal an-seo. is beag orm gu bheil mòran rudan an-seo fhathast a bha dùil agam an reic aig ebay no àiteigin, ach is coltach nach eil duine sam bith gan iarraidh. bu chòir dhomh an tilgeil dhan sgudal.

ceart ma-tha, gabhaidh mi fras a-nis agus thèid mi sìos dhan bhaile airson greis...
:-)
chunnaic mi brògan uabhasach brèagha ann an uinneig bùtha an seachdain seo, brògan samhraidh, uaine, agus tha dùil agam am feuchainn, feuch an tig iad rium. ach chan eil airgead agam co-dhiù, hehe.
mona

an t-earrach anns a' ghàrradh beag agam

2006-04-02T17:29:00.000+02:00

bha mi a' smaoineachadh gun robh iad marbh. a' chiad fear, 's e hopfen a th' ann (a bheil cuideigin eòlach air an t-ainm gàidhlig no beurla?), agus bha e uabhasach mòr an-uiridh, bha e a' sreap air fead a' bhalla. am fear eile, 's e sùbhag-craoibh a th' ann agus bha e sgoinneil an-uiridh cuideachd. nuair a cheannaich mi e bha e gu math beag - agus bha e sgrìobhte air a' phacaid gur e dris nan smeur dubha a th' ann. mar sin, bha mi a' feitheamh gum fàs iad dubh - ach an uair sin mhothaich mi gun robh iad glè bhlasda mar-tha nuair a bha iad dearg :-)
tha mi cho toilichte am faicinn beò a-rithist. tha mi an dòchas gum fàs iad gu math am bliadhna. chan eil rud cho brèagha ri beatha ùr a-muigh as t-earrach, a bheil?

dathan ùra as t-earrach :-)

2006-03-21T12:15:00.000+01:00

Tha an t-earrach a' tighinn a-nis gu dearbh, nam bheachd-sa. Tha equinox ann an-diugh (no an-dè?) cuideachd. Mar sin, bha an sunnd orm rudeigin ùr a cheannachd. (Haha, deagh leisgeul airson airgead a chosgadh :p) Cheannaich mi "aodach ùr" - chan ann air mo shon fhèin, ach airson an àirneis-taighe. Anns a' gheamhradh, is toigh leam dathan dorcha "trom", mar eisimpleir dubh-deargh, donn is eile. Ach as t-earrach is fheàrr leam dathan an earraich mar a chì sibh an-seo.
(Bha dealbh eile ann cuideach ach bha mo chèile a' gearan gum b' urrainn d' a h-uile duine an leabaidh fhaicinn leis an sgudal ri taobh :-P haha...)

henry rollins // calanais stoned

2006-03-18T16:34:00.000+01:00

a bheil sibh eòlach air an duine sin? 's e seinneadair a th' ann agus bha e an sàs le black flag (seòrsa punc) anns na 80ean agus le ceòl eile as-dèidh sin, sgrìobh e leabhraichean is rinn e filmichean cuideachd. 's e duine gu math inntinneach a th' ann, ach cha robh mi eòlach air cho math. tha cuid de na clàran aig mo chèile.
a-raoir bha henry rollins ann an köln, ach cha do chluich e consairt le ceòl - bha e air an ùrlàr na aonar, ag innse. seadh, a' bruidhinn gu bhith 3 uairean a thìde, ann an dòigh uabhasach inntinneach is tarraingeach. bhruidhinn e mu iomadh rudan, ann an dòigh annasach math - bho walmart agus fhàsach cultarach ann an aimeirigea, poileataigs an t-saoghail, gu siubhal air trèana transsiberian agus cur a-mach anns an taigh-bheag, no an uair sin dh' innis e mu na tursan aige ann an ospadalan anns na staitean aonaichte do shaighdearan a chaidh a ghoirteachadh ann an iraq... bha e a' gluasad eadar èibhinn is fiadhaich fad na h-ùine, tha e uabhasach math air atharrais air guthan no dual-chainnt a dhèanamh, is coltach gu bheil e a' toirt sùil mionaideach air an t-saoghal, a' faicinn cùisean mar a tha iad, uaireannan cruaidh, uaireannan iongantach.
cha do mhothaich mi mar a chaidh an ùine seachad. abair oidhche inntinneach! ma thig e don bhaile agaibh, rachaibh ann, fiù 's mura bheil sibh eòlach air an ceòl agaibh no fiùs mur a bheil sibh measail air punc is ròc, is fhiach e!

dh' innis janni mu "callanish stoned", dealbh-cluich a chunnaic i aig SMO. chunnaic mi-fhìn an duilleachan air an latha mu dheireadh agam ann an leòdhas - agus mhothaich mi gun robh e air a chluich na trì laithean roimhe - fad 's a bha mi ann - gach oidhche ann an steòrnabhagh. gaaaaaah. agus tha an dealbh-cluich air sgrìobhadh le kevin mac neacail, bàrd òg as toigh leam gu mòr! gaaaaaaah.

co-dhiù, tha an t-earrach a' tighinn an-seo, is a-màireach tilgidh mi a h-uile sgudal bhon bhalcon agam (hmm, an tilg mi dìreach sìos dhan lios e? ;-)) agus tha mi ag iarraidh flùraichean ùra a cheannachd ach tha e ro fhuar 'san oidhche fhathast. ach tha cuid lusan ann a tha beò fhathast as-dèidh a' gheamhraidh, feumaidh mi dìreach a h-uile rud a sgioblachadh is a ghlànadh.
bidh a' chaisg ann a dh' aithghearr agus bi co-latha breith aig a h-uile duine anns an teaghlach agam-sa is aig mo chèile. rugadh sinne fhèin a-mhàin air "taobh eile na bliadhna", mise 'san damhair, esan 'san dùbhlachd. gach bliadhna 'sa mhàirt is ghibhlean feumaidh sinn mòran gibhtean a cheannachd ;-)

Dealbh à Leòdhas, agus dùrachd às a' Ghearmailt

2006-03-15T21:25:00.000+01:00

Tha mi air ais aig an taigh a-nis agus innsidh mi tuilleadh mun turas agam a dh' aithghearr. Seo dealbh bhon tràigh ann an Gabhsann, taobh an iar Leòdhais :-)

port rìgh le sneachda

2006-03-08T13:45:00.000+01:00

Chaidh mi sìos a Phort Rìgh an-dè, airson airgead fhaighinn (cha deach sin gu math) agus airson dol do na bùithean (chaidh sin nas fheàrr ;-)). Bha mi a' cabadaich greis leis an tè laghach ann am bùth SMO, agus bha mi a' coiseachd mun cuairt anns a' bhaile bheag sin air a bheil mi eòlach cho math... cha turas a thèid mi ann bidh mi a' faireachdainn mar gun tighinn dhachaigh - ged a tha àitean mòran nas àlainne, nas fhiadhaiche, nas aonranaiche anns na h-Eileanan... ach ann an dòigh, bidh mi daonnan ann an sunnd glè mhath ann am Port Rìgh, agus tha an cuimhne air laithean eile sunndach an còmhnaidh a' coiseachd ri mo thaobh mar thaibhse nuair a bhitheas mi ann, nam aonar gu tric, a' smaoineachadh air latha no eile nuair a bha mi ann le caraid air choireigin. Gah, tha mi ag innse rudan gòrach... ;-)
Bidh biadh ann a-nis, feumaidh mi dol ann, feuch am faigh mi rudeigin blàsda mus bidh e air falbh!

turas ann an tarscabhaigh

2006-03-06T21:23:00.000+01:00

turas coiseachd fheasgair ann an tarscabhaig

2006-03-06T21:11:00.000+01:00

slèite a-rithist

2006-03-06T13:08:00.000+01:00

dealbhan eile ;-)

sealladh air cùlaibh a' cholaisde fo ghrèin meadhan-latha. bha mi nam shuidhe anns an leabharlann, leis an sealladh seo a-muigh, agus cha b' urrainn dhomh suidhe fada... ;-)
is bochd nach eil an camara cho math, tha na dealbhan ceart gu leòr nuair a tha iad beag, ach ma chliceas sibh orra (haha, abair gàidhlig), chì sibh gur e droch camara a th' ann. grrr.

beagan dhealbhan

2006-03-06T09:41:00.000+01:00

tha mi aig sabhal mòr ostaig còmhla ri janni an-dràsda. rinn mi cuid dhealbhan leis a' chamara digiteach an-dè. chan eil iad cho uabhasach math, gu mi-fhortanach chan eil camara ceart agam na laithean seo, oir tha am fear aosda briste. ach co-dhiù, seo sealladh no dha le cholaisde na gàidhlig anns an eilean sgìtheanach 'san t-sneachd :-)

Seann Ghrèugais

2006-02-26T20:42:00.000+01:00

Tha mi air rud ùr a thoiseachadh:
http://nikostrate.blogspot.com - seo am blog Seann Ghrèugais agam, Seann Ghrèugais tro mheadhan na Gàidhlig. Is toigh leam gu mòr an cànan seo agus bha daonnan dùil agam ionnsachadh. Cha robh e mar chùspair ceart aig an sgoil agam, ach bha seòrsa buidheann no club ann... ach cha deach mi ann gu tric. A-nis aig an oilthigh, tha mi a' smaoineachadh gum bitheadh e feumail nam bitheadh Seann Ghrèugais agam, oir tha mi ag ionnsachadh seann chànanan eile, Seann Ghàidhlig is Seann Lochlannais, mar eisimpleir, agus gun teagamh tha iad uile ceangailte.
Ach tha mi choooo leisg - mar sin bha mi a' lorg dòigh snog is freagarrach airson beagan Seann Ghrèugais ionnsachadh. Is toigh leam an eadar-lìon agus tha mi ann gu tric, 's urrainn dhomh dol ann bhon obair is bhon oilthigh cuideachd... mar sin, thoisich mi am blog ud. Tha dithis eile le Gàidhlig, Chuck à Alasca agus Ulli às a' Ghearmailt, airson beagan Seann Ghrèugais ionnsachadh cuideachd agus tha mi an dòchas gum bi sin feumail dhuinn. Ma tha ùidh agaibh ann - thoiribh sùil a-steach! :-)

obair is saor-laithean

2006-02-17T12:26:00.000+01:00

Math dh' fhaodte gun robh cuid dhiubh a' smaoineachadh: Dè tha ceàrr le Mona, carson nach do sgrìobh i an-seo o chionn greis?
Uill, a' chiad adhbhar: Bidh deuchainn cudthromach agam aig an oilthigh an 28mh latha dhen mhìos seo agus feumaidh mi ionnsachadh. Ach leis an fhìrinn innse... chan eil mi uabhasach trang le sin ;-) Bidh mi ag ionnsachadh rud beag airson uair a thìde gach madainn a-nis. An-dèidh sin, bidh mi a' cabadaich air Skype ri ban-charaid a tha ag ionnsachadh Gàidhlig cuideachd. Tha saor-laithean aig an oilthigh, chan eil agam ri siubhal ann gach latha. Ach feumaidh mi obair mòran. Gach turas a bhitheas saor-laithean againn aig an oilthigh, cha bhi saor-laithean agam dha-riribh, oir 's urrainn dhomh obair tuilleadh an uair sin. Feumaidh mi obair co-dhiù, oir tha agam ris a h-uile càil a phàigheadh leam fhìn - chan fhaigh mi taic sam bith bho duine no àite oifigeal sam bith. Gu fortanach, bidh mo chèile a' pàigheadh a' mhòr-chuid dhen mhàl agus biadh. Ach feumaidh mi 750 € a phàigheadh gach semester aig an oilthigh. Agus feumaidh mi leabhraichean is rudan eile, agus bho àm gu àm tha mi ag iarraidh dol a dh' Alba ;-)
Tha mi ag obair mar thidsear no neach-taic do sgoilearan. Tha mi a' teagasag cùrsaichean choimpiutair is cànan (Gearmailtis) do inbhich cuideachd, ach 's ann le clann a tha mòr-chuid an obair agam. Chan eil an seòrsa obair seo cho àbhaisteach ann an Alba no Sasainn, tha mi a' smaoineachadh (chan eil fhios agam mu Aimeirigea): Bidh mòran pàrantan an-seo 'sa Ghearmailt a' pàigheadh cuideigin - oileanach mar eisimpleir - airson leasanan-taic a thoirt don chlann mura bheil iad a' dèanamh cho math san sgoil. Mar as àbhaist, thèid an duine no tè dhan taigh do thaigh an teaghlaich turas no dhà gach seachdain, airson cuideachadh leis an obair-dhachaigh, rudan doirbhe a mhìneachadh etc.
Thòisich mi-fhìn leis an obair seo nuair a bha mi fhathast 'san sgoil, bhithinn ag obair le clann nas òige. A-nis, tha mi air an obair seo a dhèanamh 13 no 14 bliadhna agus bidh mi ag obair le clann òga is sgoilearan àrd-sgoil, le oileanaich is inbhich. 'S ann le Laideann, Gearmailtis is Beurla a bhitheas mi a' toirt cuideachadh do na sgoilearan mar as trice, ach cuideachd le Matamataigs no cùspairean eile ma tha sin a dhìth orra.
Is toigh leam an obair seo, oir is toigh leam cànanan a theagasg agus is toigh leam faicinn mar a tha daoine a' fàs nas fheàrr agus ag ionnsachadh agus a' fàs toilichte leotha fhèin. Ach uaireannan bidh sgoilearan dìreach uabhasach agam - no pàrantan dìreach uabasach... bhitheadh iomadh sgeul agam, ach is dòcha nach eil sin cho inntinneach dhuibh.
Co-dhiù, tha sgoilearan gu leòr agam na laithean seo, agus tha sin math o chionn 's gu bheil mi a' faighinn airgead gach latha, ach tha mi gu math trang cuideachd. Chan e dìreach gun tèid mi ann agus nì mi an leasan leotha - feumaidh mi rudan freagarrach a lorg cuideachd, à leabhraichean, no sgrìobhaidh mi-fhìn rudan a bhitheas feumail dhaibh, is bidh mi a' lorg teacsan inntinneach air an eadar-lìon.
Tha triùir agam aig a bheil trioblaid mòr le Laideann, agus tha iad anns an 6mh bliadhna 'san àrd-sgoil, tha sin a' ciallachadh gu bheil iad air Laideann ionnsachadh 4 bliadhna, ach is coltach gun robh iad nan cadal fad na h-ùine ;-) - chan eil gràmar sam bith aca, agus a-nis thòisich iad teacsan eachdraidh is bàrdachd Laideann a leughadh san sgoil. Mar sin, tha tòrr agam-sa ri dhèanamh air an son.
Ceart ma-tha, tha beagan fhios agaibh a-nis dè tha dol aig Mona :-)

dealbhan àlainn

2006-01-30T13:05:00.000+01:00

Chunnaic mi làrach-lìn le dealbhan camara àlainn à Alba an-diugh: http://walks.theboyhope.com/ Is coltach gum bi an duine seo a' siubhal air feadh Alba gu tric, uisge ann no às, as t-samhradh, 'sa gheamhradh, 'sa cheò, 'sa ghrèin... agus chìthear a h-uile rud air an làrach-lìn. Tha mi rud beag farmadach! ;-) Is toigh leam dealbhan a thogal, ach gach turas a bha mi ann an Alba na bliadhnaichean sa chaidh, bha rudeigin ceàrr leis a' chamara agam. A-nis tha e gu tur briste agus chan eil airgead agam airson fear ùr, grrr.
mona

naidheachdan

2006-01-29T14:28:00.000+01:00

Tha mòran a' tachairt ann an coimhearsnachd Gàidhlig eadar-nàiseanta air an lìon na laithean seo. Tha am fòrum aig savegaelic.org dùinte, agus chì sinn cò paigheas $1500 airson làrach-lìon falamh le lèintean-t grod is naidheachdan aosda is dath eagallach ;-)

Dh' fhosgail dà h-àite inntinneach ùr co-dhiù, fear aig http://31.freebb.com/gaidhlig/gaidhlig.html agus fear eile (a' chiad, leis an fhìrinn) ann an "Taigh na Gàidhlig" - tha mi dhen bheachd gur e obair math a th' ann an dhà agus bidh mi ann bho àm gu àm, ach leis gu bheil a' bhòrd-bràth Gàidhlig/Gearmailtis cho trang a-nis agus mòran daoine ùra ann, cha bhi mi air na h-àitean eile cho tric. Ach air an làimh eile, bidh saor-laithean aig an oilthigh a dh' aithghearr agus is math dh' fhaodte gum bi mi air an eadar-lìon fad an latha a-rithist ;-)

Tha sinn a' faicinn mòran blogaichean ùra cuideachd, agus tha sin air leth math. Is toigh leam leughadh bho na daoine eadar-dhealaichte, bho dùthchanan is culturan eadar-dhealaichte, uile a' sgrìobhadh 'sa Gàidhlig mu 'n cuid beachdan is tachartasan. Tha Gàidhlig fìor mhath aig mòran dhe na daoine a tha ann, is gu h-àraidh tha e a' cur iongnadh orm dè cho luath a tha feadhainn ag ionnsachadh. Tha mòran daoine ag ionnsachadh leotha fhèin, gun cùrsaichean no daoine fileanta faisg orra, agus chan eil sin furasda idir.
Cùmaibh oirbh, tha sibh sgoinneil! :-)

Tha mi-fhìn càran leisg, tha mi a' faicinn air Tìr nam Blog gun tèid mòran a sgrìobhadh gach latha, is rudan inntinneach a th' annta. Feumaidh mise sgeulachd no dhà innse a-rithist cuideachd - cha do dhìochuimhnich mi gun do gheall mi sgeulachdan eile le cannabis innse ;-) Agus mhothaich mi nach do dh' innis mi mòran mun turas againn ann an Vienna 'san Dubhlachd nas motha, nàire orm. Agus tha an semester aig an oilthigh gu bhith seachad a-rithist agus bidh deuchainn anns an roinn Lochlannach agam 'sa Ghearran agus bidh co-labhairt nan oileanach "Ceilteach" 'sa Ghearmailt againn cuideachd, is feumaidh mi aiste no dhà a sgrìobhadh... aaaaah - cuidichibh mi! ;-)

Co-dhiù, sgioblaich mi an coimpiutair 's a h-uile hard disk aosda an-diugh. Tha an stuth gu lèir air an hard disk snog mòooooor ùr a thug mo chèile dhomh mar ghibht na Nollaige a-nis :-) 100 GB, cha chreid mi sin. 'S urrainn dhomh mòran sgudail a chur sìos bhon eadar-lìon a-nis, hehe. Tha a h-uile stuth bho 3 hard disks aosda ann a-nis agus tha àite falamh gu leòr ann fhathast.
Obh obh, 's e geek a th' annam gu dearbh ;-)
mona

blog ùr

2006-01-22T17:23:00.000+01:00

cuiribh fàilte air blog ùr - thèid a sgrìobhadh le cam, beathag is ru-ra, sgioba glè mhath a-rèir coltais, agus bidh mòran rudan inntineach ri leughadh bhuapa, gu cinnteach!
mona

sàmhach

2006-01-18T11:25:00.000+01:00

obh obh, cha do sgrìobh mi dad an-seo ùine fhada. chan eil fhios agam carson, chan eil mi cho uabhasach trang le rudan eile... leis an fhirinn innse, tha mi caran leisg na laithean seo :)
dh' èisd mi ri rud snog air radio nan gaidheal an-dè: bha còmhradh ann eadar ruairidh mac thòmais agus aonghas mac neacail anns a' phrògram "gun dèan mi rann". tha mi a' faicinn an-dràsda nach eil e ann fhathast, chuir iad prògram ùr ann. gu fortanach rinn mi... ooooh, cha do rinn mi dad, bhitheadh sin mi-riaghail, nach bitheadh? :P

tha bòrd ùr agam anns an t-seòmar agam (seadh, seòmar anns an taigh, agus bòrd fiodh, chan eil mi a' bruidhinn mu seòmraichean 'san eadar-lìon agus bòrd-bràth an-dràsda, hehe). nì mi dealbhan a dh' aithghearr, ach feumaidh mi mòran sgudal a sgioblachadh an toiseach. tha coltas snog air an seòmar suidhe againn a-nis cuideachd, ach tha an lus a bha agam air an sgeilp gu bhith marbh :( 's e gort a bh' ann, agus tha iad pàilt air a' bhalcon agam a-muigh, ach cha robh e gu math anns an t-seòmar idir. an toiseach bha eagal orm nach cuir mi uisge gu leòr air, ach an uair sin tha e coltach gun do chuir mi cus uisge air. chan eil mi math le flùraichean anns an taigh idir :(

an-diugh fon uinneig agam

2006-01-12T13:08:00.000+01:00

oidhche challainn :-)

2005-12-31T09:12:00.000+01:00

tha mi an dòchas gum bi oidhche snog agaibh (le deoch gu leòr no na thogras sibh...) agus gun toisich bliadhna mhath ùr dhuibh! :-)

cha bhi mi-fhìn trang an-diugh, tha dùil agam rudan beaga a dhèanamh an-siud 's an-seo 'san taigh (tha sinn fhathast an sàs le àirneis ùr agus rudan a ghluasad mun cuairt...) agus 'san fheasgar coinnichidh sinn ri caraidean agus thèid sinn dhan taigh-dhealbh - bidh sinn a' coimhead air harry potter :-D an uair sin thèid sinn dhan taigh-seinnse èireannach/albannach agus gabhaidh sinn leann ubhal no tè bheag no dhà... :-)
slàinte mhath!

mill a h-uile blog >:-|

2005-12-28T12:30:00.000+01:00

gaaah, sgoinneil. dh' fheuch mi rudeigin ùr leis an template, agus chan eil e ag obrachadh. ma thigear do theachdaireachd air choreigin an-seo mar eisimpleir bho thir nam blog, chithear ceangail leis na faclan "sgrìobh do bheachd" agus "air ais dhan bhlog" fon sgrìobhadh bhuam, ach chan eil an ceangal aig "sgrìobh do bheachd" ag obrachadh. tha am fear eile ceart gu leòr. dh' atharraich mi na faclan oir bha beurla ("home") agus gearmailtis ("kommentar einfügen" no rudeigin) ann. ach rinn mi rudeigin ceàrr leis an càc... eeeeh, leis an code anns an template. cha bhi sin ann nuair a thig cuideigin bho phrìomh-dhuilleag a' bhloig... bidh na freagairten ag obrachadh ceart gu leòr an uair sin oir tha duilleag eile ann, an tè gheal.
a bheil sibh gam thuigsinn? grrr. thug mi sùil air na source codes aig daoine eile, ach cha robh mi a' tuigsinn dè rinn mi ceàrr. tha sin rud beag doirbh o chionn 's gu bheil an source code eadar-dhealaichte bhon template... tha cus stuth sònraichte ann a tha a' buinneadh don dearbh dhuilleag a tha ri faicinn.
a bheil comhairle aig duine sam bith?

hehe, nach math gu bheil mi nam shuidhe anns an oifis gòrach seo 4 uairean a thìde gach latha agus chan eil dad feumail agam ri dhèanamh :-P
ach thèid mi do IKEA 'san fheasgar an-diugh... :-D

ma tha sibh airson rudeigin inntinneach (agus tàmailteach) a leughadh mu phoileataics chànan, rachaibh dhan blog aig graisg...!

ceart ma-tha...

2005-12-27T16:58:00.000+01:00

tha sgeulachdan gu leòr agam ri innse ;) dè tha sibh ag iarraidh an toiseach? aithris bho na saor-laithean ann am wien? sgeul na nollaige? sgeul eile mu channabis? ;)
chì sinn...

tha laithean saora agam a-nis agus tha mi an dòchas nach bi mi ro leisg.

agus seo gleann a' cheò...

2005-12-23T10:33:00.000+01:00

... ann am meadhan a' gheamhraidh ;)

thòisich na bruadaran a-rithist...

2005-12-23T09:35:00.000+01:00

canaidh sinn "rauhnächte" ris na 12 no 13 oidhchean an-dèidh meadhan a' gheamhraidh (no an-dèidh na nollaige, a-rèir beus crìosdail). 's iad oidhchean làn dhraoidheachd. anns na seann laithean, chuir fear an taighe beannachd air a' chrodh anns an àm seo, agus cha robh e ceadaichte obair nighe no snìomh a dhèanamh. bha na daoine a' smaoineachadh gun robh an "wilde jagd" a-muigh, tha seo beagan coltach ri oidhche shamhna anns a' ghaidhealtachd: bidh dorsan dhan t-saoghal eile fosgailte, bidh na marbh a' tighinn dhan t-saoghal againne, bidh "frau holle", a tha co-cheangailte ri seann mna-dìa mar "holda" no "hel", a' coiseachd faisg air na bailtean còmhla ri spioraidean na cloinne marbh, agus is urrainn do na beathaichean bruidhinn, gum bi na daoine gan tuigsinn, agus is dòcha gum bi iad ag innse rudeigin mun àm ri teachd.

dhomh-fhìn tha na bruadaran as cudthromaiche... tòisichidh iad gach bliadhna mun àm seo... cha bhi mi riamh cinnteach dè an latha, ach thig iad, agus bidh iad ann airson seachdain no nas fhaide, gach oidhche nam chadal... bruadaran làidir, soilleir, neònach, àlainn, eagallach, annasach, troimhe-chèile... mar nach eil iad riamh aig àm eile dhen bhliadhna. feumaidh mi a bhi faiceallach nach dìonchuimhnich mi iad ro luath 'sa mhadainn, oir uaireannan innsidh iad dhomh rudan gu math inntinneach - mu mo dheidhinn, mun t-suidheachadh anns a bheil mi, mun bheatha agam, mu cheistean a bha mi a' cur air falach ann an oisean m' inntinn...
chan innis mi dè bha annta a-raoir agus an oidhche roimhe, ach tha mi toilichte gu bheil iad ann.

ceangail

2005-12-21T22:40:00.000+01:00

chuir mi cuid cheangail ùra ann do bhlogaichean eile... ma tha blog gàidhlig agaibh agus mura bheil sibh a' faicinn ceangal thugaibh an-seo, sgrìobhaibh thugam! gu tric chì mi blogaichean ùra a' nochdadh agus bidh mi a' smaointinn "oh nach math a tha sin", ach dìochuimhnichidh mi ceangal a chur ann an-seo.
oh, agus tha na rionnagan (* * *) a' ciallachadh gu bheil na blogaichean sin a' còrdadh as fheàrr rium - chan eil sin a' ciallachadh gu bheil an fheadhainn eile dona idir!!! ach sin an fheadhainn as fheàrr leam-sa :)

meadhan a' gheamhraidh

2005-12-21T21:10:00.000+01:00

... agus tha an cnatan orm. feumaidh gun do ghabh mi ann an wien e, oir bha e gu math fuar agus gaothach agus bha sinn a-muigh fad na h-ùine. gu fortanach, chan eil agam ri obair mòran an seachdain seo agus bidh deireadh-seachdaine snog ciùin againn...
innsidh mi dhuibh uair eile ciamar a bha e ann an wien, agus feumaidh mi innse rud beag mu bheachdan ùra a tha agam airson rudan co-cheangailte ri gàidhlig... :) ach tha mo cheann gu math falamh a-nochd.

cuimhne cuimhne dìochuimhneachadh...

2005-12-19T22:25:00.000+01:00

(chuir mi cuid rann air falbh an-seo air sgàth 's gun do chuir mi a-steach do cho-fharpais bhàrdachd iad)

bainne dubh na mochthrath
òlaidh sinn e 'san fheasgar, 'sa mhadainn, 'san oidhche
...

(paul celan)

dealbhan à wien / vienna

2005-12-16T19:41:00.000+01:00

sgrìobhaidh mi tuilleadh dha na dealbhan seo uair eile, tha mi dìreach airson an sàbhalach àiteigin an-dràsda oir tha dùil agam an camara a chleachdadh a-rithist a-màireach :)

saor-laithean beaga / leabhraichean

2005-12-14T22:48:00.000+01:00

Bidh sinn ann am Wien bho a-màireach gu Di-Luain an ath-sheachdain :) Bidh sinn a' fuireach aig caraidean agus tha an t-eadar-lìon aca cuideachd, ach cha chreid mi gum bi mi ann gu tric... tha sinn ag iarraidh fois agus spòrs. Tha dùil agam dealbhan-camara a thogal, agus is dòcha gun cuir mi feadhainn ann an-seo fad 's a bhitheas mi an-sin (mura dìochuimhnich mi a-màireach an camara a chur anns a' bhaga, haha).

Rud eile, chuir cuideigin aig an oilthigh leabhar-ionnsachaidh Gàidhlig thugam air nach robh mi eòlach roimhe: "Can Seo". Tha e gu math aosda, ach inntinneach gu leòr airson luchd-toiseachaidh, ged nach eil fhios agam a bheil e fhathast ri faighinn idir. Tha tèipichean ann cuideachd a tha gu math snog.
Ach an rud as inntinniche dhomh: an toiseach cha robh mi cinnteach dè bha ann a chòrd rium mu shealladh an leabhair... ach mu dheireadh thall mhothaich mi - tha tiotal Gàidhlig air! Chan eil mi eòlach air leabhar-ionnsachaidh eile idir - oh, tha e dìreach a' tighinn do m' inntinn, tha "Cothrom Ionnsachaidh" le Ronald Black ann cuideachd!!! - ach chan eil mi eòlach air leabhar eile le tiotal Gàidhlig. An fheadhainn a bhitheas a h-uile duine a' cleachdadh: Teach Yourself, Colloquial, Speaking our Language... ainmean Beurla orra uile. Agus cha do mhothaich mi gus an-diugh gur ann seo an rud nach chòrd rium mun deidhinn...
Nuair a bha mi aig an sgoil, bha e gu math inntinneach dhomh gun robh tiotal anns a' chànan fhèin air gach leabhar-ionnsachaidh a fhuair sin: Beurla, Laideann, Frangais, Eadailtis - b' e "Green Line" an tiotal air an sreath leabhraichean Beurla a bha againn, agus mas math mo chuimhne bha sin bho ainm aig bus ann an Lunnain no rudeigin. Bha leabhraichean Laidinn againn leis an tiotal "Ostia" agus tha sin a' ciallachadh "dorsan" no "geata". B' e "Buongiorno" no rud mar sin air an leabhar Eadailtis. Agus tha mi dìreach air sreath leabhraichean-ionnsachaidh fhaighinn à Lithuania, air a bheil "Po truputi", a' ciallachadh "Beag air bheag". Tha mòran de na sgoilearan air a bheil mi eòlach ag ionnsachadh Frangais le leabhar leis an ainm "Decouvertes", is toigh leam sin cuideachd. 'S e "Kantharos" an leabhar-ionnsachaidh Seann Ghrèugais a thèid a chleachdadh mar as trice.
Dè tha mi ag iarraidh leis na h-eisimpleirean seo uile? Uill... tha mise dhen bheachd gu bheil ainm anns a' chànan fhèin a' toirt misneachd dhan luchd-ionnsachaidh. Is dòcha gur e rud "psychological" a tha ann. Tha mi a' smaoineachadh gum bi ainm inntinneach a' tarraing nan daoine a-steach dhan leabhar, dhan chànan. Bha mi-fhìn an comhnaidh a' faireachdainn coltach ris sin co-dhiù. Bidh mi a' coimhead air an leabhar agus bidh fios agam gu bheil mi ag obair le is anns a' chànan seo a-nis.

Is bochd nach eil tiotal Gàidhlig air tuilleadh dhe na leabhraichean-ionnsachaidh Gàidhlig, nam bheachd-sa. Bidh cus dhaoine a' bruidhinn cus mu dheidhinn a' chànain fad na h-ùine seach anns a' chànan co-dhiù. Agus tha sreathan leabhraichean mar "Speaking our Language" a' sealltain, ann an dòigh, gu bheil e ceart gu leòr bruidhinn mu "ar cànan" ann an cànan eile - nach neònach sin?

faaaaadalach

2005-12-13T00:27:00.000+01:00

tha mi nam shuidhe ann an cafaidh eadar-lìn ann an köln a-rithist... mar as àbhaist... bha oidhche anabarrach math againn aig sgoil na gàidhlig aig mìcheal ann am bonn, le 20 daoine às na cùrsaichean agus biadh mòr agus òran nollaige agus film snog. ach bha an oidhche ro fhada, agus a-nis feumaidh mi feitheamh gu bhith uuuuuaaaaair a thìde airson an trèana eile gu wuppertal. gnagnagna.

och, rud eile: a bheil "gruth is uachdar" aig cuideigin air bhideo?

oh agus rud eile: cha sgrìobh mi tuilleadh sgeulachdan mu channabis gus am faigh mi mòoooooran freagairtean ris a' chiad sgeul :-P tha saoghal nam blog air fàs rud beag leisg ;-) a bheil sibh uile trang le gibhtean na nollaige a cheannachd no fìon òl air fèillean na nollaige??
ach leugh mi sgeul inntinneach mu chuairt seilg aig chuck, agus chunnaic mi gu bheil sgeul eile bhuaithe ann an "cothrom", iris aig clì. is math a rinn thu, a thearlaich, is toigh leam leughadh bhuat!

:-)

2005-12-12T11:13:00.000+01:00

buaidh eile air a' bheurla ann an saoghal nam blog: seallaibh air an taobh deas --->

ghabh mi orm a-steach ann an uamh cunnartach an "template" a-rithist agus thilg mi na uilebheistean dona - "about me" agus "view my complete profile" na h-ainmean orra - a-mach às an àite glan gàidhlig seo ;-) ha!
mona, ban-ridire phròiseil ann an strì na gàidhlig air feadh an eadar-lìn... hmmmm... an dèan mi rudeigin feumail a-nis?

cadal a' gheamhraidh :)

2005-12-11T17:55:00.000+01:00

abair deireadh-seachdaine! bha mi air an eadar-lìon gu math fada a-raoir, a' feuchainn rudan leis na blogaichean an-seo agus a' rannsachadh blogaichean eile aig an làrach-lìn seo (uabhasach inntinneach!)
mu dheireadh thall chaidh mi dhan leabaidh mu 2 uairean 'sa mhadainn, agus cha do dhùisg mi gu leth uair an-dèidh 11 :) an uair sin bha mi dìreach a' smaoineachadh dè nì mi leis an latha, nuair a chuala mi am fòn. 's e mo chèile a bha ann, bhon oifis, agus ag innse dhomh gun do chuir a phàrantan fios thuige gun robh iad a' tighinn a chèilidh oirnn - a-nis! :o bha iad ag iarraidh dol do fèill nollaige anns a' bhaile againn. haha. chan fhiach am fèill nollaige againn draibheadh uair a thìde... ach tha sròn gu math fada aig màthair mo chèile, agus bha fios aice gun do cheannaich sinn àirneis taighe ùr as t-fhoghar agus dh' atharraich sinn na seòmraichean, agus gun teagamh bha i ag iarraidh a h-uile rud fhaicinn, ged a thuirt mi rithe turas no dhà nach eil e deiseil fhathast idir agus bhitheadh nàire orm nan tigeadh iad o chionn 's gu bheil mòran sgudal ann fhathast.
uill, tha iad a' fuireach mu 100 km air falbh bhuainn, mar sin bha mu uair a thìde againn... ;) ghabh mi fras gu luath agus choimhead mi mun cuairt nan seòmraichean agus dh' fheuch mi ris na rudan as cudthromaiche a sgioblachadh, hehe. thàinig mo chèile agus thuirt e: och, bidh sin ceart gu leòr, tha iad eòlach oirnn gu math co-dhiù :)
thàinig iad ma-tha, agus chaidh sinn sìos dhan bhaile an toiseach. bha sin snog gu leòr. chan eil am fèill nollaig cho uabhasach math, ach choimhead sinn air na rudan anns na bùithean agus dh' ith sinn rud beag an-siud is an-seo agus bha spòrs againn. cha robh am baile ro làn. dh' innis màthair mo chèile gun robh meadhan bhaile köln dùinte leis a' phoileas an-dè o chionn 's gun robh cus dhaoine ann. cha bhi mi a' tuigsinn sin a-riamh, carson a hitheas iad uile a' ruith dha na bailtean mòra gach di-sathairne ro nollaig. dìreach craicte.
co-dhiù, chaidh sinne dhachaigh an uair sin agus bha sinn nar suidhe còmhla greis fhathast, agus bha sin gu math snog. chòrd an seòmar-suidhe ùr againn riutha, agus chan eil solas ann am pàirt eile an t-seòmair far a bheil an sgudal agam, hehe, mar sin cha robh mòran dheth ri fhaicinn.

a-nis, feumaidh mi rud beag a sgrìobhadh airson an oilthigh... agus tha mi ag èisdeachd ri clàr air leth math: "songs from the cold seas" le ceòl bho mòran dhùthchanan agus cultaran 'san tuath. tha òran gàidhlig ann cuideachd, "òran na maighdean mhara", air seinn le cathaidh anna nic a' phì. is dòcha gun innis mi tuilleadh mun chlàr seo uaireigin. is toigh leam gu mòr e.

oh

2005-12-10T21:21:00.000+01:00

carson a tha mi a' gearan? tha e ann a-nis. ion-gan-tach! cha robh e ann roimhe, ged a chuir mi suas e cuid thuras :-P

grrr

2005-12-10T21:13:00.000+01:00

tha mi air mo shàrachadh! tha mi ag iarraidh rudeigin atharrachadh leis na fo-sgrìobhadhan, tha "air sgrìobhadh le mona AT..." ann agus tha mi ag iarraidh "air sgrìobhadh le mona AIG..." - agus chuir mi sin anns an template agus chan eil e ann. hmmm. an aon rud le "freagairtean", tha mi ag iarraidh "freagairt(ean)", bidh sin nas fheàrr leis an àireamh 1. carson nach eil e ann?? gah, tha mi ro ghòrach :-(

ach naidheachd eile, tha blog lietuviškas agam a-nis :-) an rud a tha èibhinn, anns a' chànan sin cuiridh iad rud mar "-as" no "-is" do fhaclan cèin, gum bi iad freagarrach airson a' ghràmar aca, ach tha "blogas" a' ciallachadh "dona" :o
mar sin, chan eil mi cinnteach fhathast ciamar a chanas mi "blog" gu ceart anns a' chànan sin. agus cha do lorg mi daoine à lietuva anns a' bhlogosphere gu ruige seo idir :-(

lietuviškas

2005-12-10T13:59:00.000+01:00

uff... tha mi air post-d fada a sgrìobhadh, gu boireannach ann an lithuania (cha d' fhuair mi a-mach fhathast a bheil ainm gàidhlig air an dùthaich sin). fhuair mi an seòladh post-d aice tro comunn "tandem" a tha a' toirt cuideachadh do daoine air feadh an t-saoghal faighinn lorg air daoine eile airson cànanan ionnsachadh agus a chleachdadh. is toigh leam cànanan ionnsachadh (hehe, cha chuir sin iongnadh oirbh ;-)) agus tha mi luath gu leòr le gràmar, ach feumaidh mi cànan a chleachdadh gu tric gus nach dìochuimhnich mi a h-uile rud a-rithist. gu h-àraidh tha mi diùid le bruidhinn. ach is toigh leam leughadh is sgrìobhadh air an eadar-lìon anns a' chuid chànanan a tha agam, agus cha chreid mi nach feuch mi ri blog no dhà eile a thoiseachadh, ann an nirribhis no lithuanian no innis tìlis, is dòcha :-)

ach 's i gàidhlig cànan mo chridhe agus m' anam gu bràth!!! :-)

sgeulachdan na crìoche, pàirt 1

2005-12-09T10:49:00.000+01:00

Mar a dh' innis mi do Eòsaph, thàinig sgeulachd no dhà dham chuimhne nuair a bha mi a' leughadh an sgeòil fhada aige. Feuchaidh mi ri innse rud beag an-seo a-nis.

Cuid bhliadhna air ais, bha mo chèile fhathast a' fuireach aig taigh a phàrantan. Tha iad a' fuireach ann an sgìre taobh an iar-tuath na Gearmailt, faisg air a' chrìoch dhan Olaind. 'S e tìr brèagha a th' ann, le achaidhean farsaing, tòrr uillt agus coilltean beaga agus gun teagamh, an abhainn mhòr Rhein. Chan eil mòran bailtean mòra ann. Tha seann bhaile no dhà aig an Rhein (agus gu math sean a tha iad, ach 's e sgeul eile a th' ann), ach timcheall air sin chan eil ach bailtean beaga agus bailtean-fearainn agus taighean aosda mòra aonranach aig na rathaidean fada caol tro na h-achaidhean. Chan eil diofar mòr eadar an dùthaich air dà thaobh a' chrìoch. Tha fiù 's ainmean nam bailtean agus dual-chàinnt nan daoine gu math coltach ri chèile air an taobh Ghearmailteach agus an taobh Olaindeach anns an sgìre sin. Agus chan eil crìoch ri fhaicinn idir. Bidh thu a' coiseachd no a' draibheadh air rathad caol fada air choreigin agus gu h-obann chì thu sanas reic no rudeigin ri taobh an rathaid ann an cànan cèin, agus an uair sin bidh fios agad gu bheil thu ann an dùthaich eile.

Ach tha aon diofar mòr ann eadar an Olaind agus a' Ghearmailt: Tha cannabis ceadaichte anns an Olaind, ach chan eil anns a' Ghearmailt. Uill, chaidh an lagh atharrachadh o chionn beagan bhliadhnaichean, agus ann an dòigh, tha e ceadaichte a-nis anns a' Ghearmailt cuideachd cannabis a chleachdadh, ach chan eil e ceadaichte a reic. Mar sin, cha chuir e iongnadh oirbh dè dh' innseas mi a-nis: Tha an cannabis gu math daor air feadh na Gearmailt, o chionn 's gun tèid a sgaoileadh air slighean dìomhair. Agus thèid na daoine òga a tha a' fuireach faisg air an Olaind thar a' chrìoch airson cannabis faighinn anns na bùithean "cofaidh" an-sin agus is dòcha airson a reic do na caraidean aca an-seo.
Gun teagamh tha sin gu math furasda ann an sgìre mar an Niederrhein, far an robh mo chèile a' fuireach, far nach eil bailtean mòra agus far an rachar thairis air a' chrìoch gun dragh sam bith. Ach gun teagamh, 's aithne dhan phoileas an suidheachadh seo, agus gu math tric bidh iad a' draibheadh mun cuairt eadar na bailtean beaga, air na rathaidean fada aonranach agus a' coimhead airson daoine òga a' tighinn bhon Olainds le cus cannabis aca, no daoine a tha a' draibheadh càr às-deidh smocadh.

Anns na laithean sin, bhitheadh mo chèile a' cluich ann an còmhlann-ciùil (ceòl roc no "meatailt") agus bha àite aca air màl ann an sabhal, far an do chùm iad an stuth aca agus far am bitheadh iad a' coinneachadh gach Dì-Sathairne airson cluich agus òrain ùra a leasachadh. Bha an t-àite seo aig baile-fearainn aonranach mu 10 mìle bhon àite far an robh e a' fuireach, agus b' àbhaist dhuinn dol ann air an rothair. Bhitheadh mo chèile a' cluich nan drumaichean, agus bha iad-san anns an t-sabhal co-dhiù (an fheadhainn aosda a bha sin, bha an fheadhainn nas fheàrr anns an t-seilear ann an taigh a phàrantan, o chionn 's gum b' urrainn dha trèanadh agus clàradh aig an taigh cuideachd). Ach uaireannan, mar eisimpleir nuair a bha droch thìde ann no adhbhar eile, rachadh sinn dhan t-sabhal anns a' chàr còmhla ri fear no dithis eile anns a' chòmhlann (b' àbhaist dhaibh-san dol anns a' chàr o chionn 's gun robh na h-innealan-ciùil aca).

Latha a bha seo, chaidh sinn ann anns a' chàr. 'S e càr mòr aosda a bha ann (bha e le pàrantan an draibhear agus bha tuathanas aca, mas math mo chuimhne), beagan salach air an taobh a-muigh agus beagan sgudalach air an taobh a-staigh, agus bha còignear no sianar againn ann. Gu h-obann chunnaic sinn càr poileis a' tighinn air ar coinneamh agus chuir iad stad oirnn. Sealladh àbhaisteach a bha seo don luchd-phoileis: càr aosda làn daoine òga, ann an aodach dubh, na balaich uile le falt fada, agus ceòl àrd sgriosail bhon inneal-CD anns a' chàr.
"A bheil sibh a' tighinn bhon Olaind?" dh' fhaighnich iad. "Chan eil" dh' fhreagair an draibhear, agus mhìnich e dhaibh cò às a bha sinn agus càit an robh sinn a' dol. Cha robh iad gar creidsinn. "A bheil cannabis agaibh?" dh' fhaighnich iad. "Chan eil" arsa sinne, agus bha sin fìor. "Am faod sinn coimhead anns na bagaichean agaibh?" dh' fhaighnich iad, agus bha sinn a' fàs beagan feargach, ach cha robh sinn ag iarraidh trioblaid agus bha sinn a' smaoineachadh gum bitheadh iad riaraichte nam faiceadh iad nach robh dad anns na bagaichean. Ach... rannsaich iad na bagaichean, agus cha do lorg iad dad, agus cha robh iad riaraichte idir. "Càit an do dh' fhalaich sibh e?" dh' fhaighnich iad, ann an dòigh beagan mhì-mhodhail, agus dh' fhàs sinne beagan mhì-mhodhail cuideachd. Chunnaic iad na h-innealan-ciùil agus thoisich iad coimhead orra gu mionaideach. Bha tòrr stuth neònach aig mo chèile a bha e air cheannachd airson nan drumaichean, agus dh' fhàs e beagan mhi-fhoisneach o chionn 's gun robh iad daor. "Bithibh faiceallach leis na rudan sin", thuirt e, "na brisibh iad!" Ach thog sin àire nam poileas gu dearbh. Bha iad cinnteach gun robh cannabis air falach annta agus dh' fheuch iad rim briseadh. Ghlac mo chèile às an làmhan iad agus thuirt e gum b' urrainn dha fhèin an fhosgladh agus an cur às a chèile, agus cha leig e leotha am milleadh. Bha aige ris a h-uile stuth a chur às a chèile agus choimhead iad air gu mionaideach. Cha robh dad ann. Cha robh iad riaraichte fhathast idir, agus chuir iad an càr gu lèir bun os cionn. Bha sinn gun fhacal a ràdh. Mu dheireadh thall chuala iad fuaim fòn anns a' chàr aca (fòn poileas, chan eil mi cinnteach ciamar a chanas mi sin), agus chaidh innse dhaibh gun deach càr a ghlacadh àiteigin làn cannabis, agus thuig sinn rudeigin mar gum b' e sin na daoine a bha iad air lorg ùine fhada, daoine a bha a' dèanamh malairt le cannabis ann an dòigh gu math mòr. Feumaidh gun robh iad a' smaoineachadh an toiseach gum b' e sinne na daoine ud. Cha mhòr gun tuirt iad "tha sinn duilich" ruinn, bha iad airson falbh gu luath. Ach bha an càr bun os cionn fhathast, agus bha iad air cuid phàirtean a chur dheth. Mar sin thuirt an draibhear: "Stadaibh!" - "Dè?" ars' iad-san. "An cuir sibh an càr air dòigh a-rithist? Tha e le mo phàrantan, agus bidh iad gu math feargach ma bhitheas rudeigin briste. Agus dè bhitheas iad a' smaoineachadh ma chanas mi riutha gur ann am poileas a rinn sin." Bha iad rud beag feargach, ach chuir iad an càr air dòigh. Dh' fhalbh iad gu luath an uair sin, agus chaidh sinne dhan t-sabhal agus ghabh sinn fois as-dèidh an tachartas sin.

Sgeulachdan eile a' leantainn... ;-)

dè nì mi airson cànan ùr a thuigsinn

2005-12-07T08:51:00.000+01:00

sgrìobh flùr thugam gu bheil trioblaid aice na daoine air an radio a thuigsinn. bha mi a' smaoineachadh gur e cùspair cudthromach agus inntinneach a th' ann. 's e seo an rud as dorra air mo shon anns gach cànan ùr cuideachd. 's àbhaist dhomh an gràmar agus faclan ùra ionnsachadh bho leabhraichean gu math luath. is toigh leam leughadh agus sgrìobhadh rud beag, agus mar sin bidh na faclan nam cheann. bidh beagan trioblaid agam le fuaim no blàs a' chànan, agus bidh mi beagan diùid le bruidhinn, ach tha mi a' smaoineachadh nach eil sin cho dona. ach nuair a chluinneas mi daoine a' bruidhinn anns a' chànan ann an dòigh àbhaisteach, gu luath agus is dòcha le dual-chainnt air choreigin, cha tuig mi dad, agus bidh mi brònach no air mo shàrachadh. gu tric, ma tha daoine eòlach orm bho chòmhradh air an eadar-lìon, bidh iongnadh orra nach eil mi an tuigsinn gu math. mar eisimplir bha mi a' feuchainn skype còmhla ri nighean ann an lietuva/litauen/lithuania, agus bha sin dìreach tàmailteach.

ceart ma-tha, dè nithear mu dheidhinn sin? uill, gun teagamh tha e cudthromach agus feumail mòran obair a dhèanamh le stuth èisdeachd bhon toiseach. gu fortanach tha mòran ann air an eadar-lìon an latha an-diugh, fiù 's - no gu h-àraidh - ann an cànanan beaga mar gàidhlig no mìon-chànanan eile anns an roinn-eòrpa. agus tha na leabhraichean-teagasg as ùire uile le clàran (CDs). ach anns na clàran seo, 's àbhaist do na daoine a bhruidhinn gu math slaodach, agus ann an dòigh glè shoilleir. tha sin math airson luchd-toiseachaidh, ach fàsar cleachdte ris gu math luath cuideachd, agus mura bheil daoine timcheall ort a bhitheas a' bruidhinn an cànan ann an dòigh nàdurrach, bidh sin beagan cunnartach.

ach tha cothrom gu leòr ann airson na cluasan a "leasachadh". mar eisimpleir, ma tha stuth agad air pàipear AGUS air CD / tèip, 's e beachd math a tha ann obair leis ann an dòighean eadar-dhealaichte. an toiseach, gun teagamh, bidh thu ag iarraidh fios dè tha dol ann, agus bidh thu a' leughadh. ach dè mu dheidhinn toiseachadh leis a' chuid èisdeachd? feuch cia mheud a bhitheas tu a' tuigsinn mus toir thu sùil air an rud sgrìobhte. an uair sin faodaidh tu leughadh agus èisdeachd aig an aon àm turas no dhà cuideachd, agus mu dheireadh thall, is dòcha, feuch ri èisdeachd a-mhàin a-rithist, agus cuir stad air as-dèidh gach seantans, agus feuch ri sgrìobhadh sìos na bha thu a' tuigsinn.

an-dèidh greis, anns gach cànan, bidh mi air mo shàrachadh le stuth-teagaisg, rudan a chaidh an dèanamh airson luchd-ionnsachaidh. tha mi ag iarraidh an cànan nàdurrach. tha leabhraichean cloinne glè mhath aig an ìre seo. cha bhi iad ro dhoirbh, bidh na cùspairean furasda, agus gu tric bidh dealbhan ann cuideachd, a' toirt taic airson an sgeul a thuigsinn. bidh na seantansan simplidh cuideachd, agus bidh faclan àbhaisteach ann - ach cha do thug an sgrìobhadair àire air gràmar airson luchd-ionnsachaidh. tha sin a' ciallachadh gum bi a h-ùile seòrsa gràmar ann, ann an dòigh nàdurrach. chan eil e coltach ris na leabhraichean-teagaisg, le mar eisimpleir leasan far am faighear teacsa le gnìomhairean anns an tràth caithte simplidh a-mhàin. chithear gnàthsan-cainnte àbhaisteach agus is dòcha cluich-faclan ann an leabhraichean cloinne cuideachd. mar sin, cha bhi iad daonnan uabhasach furasda, ach 's e dòigh math a th' annta airson ceum bho na leabhraichean-ionnsachaidh don "fìor chànan".
is bochd nach eil mòran stuth chloinne anns a' ghàidhlig ri faighinn air tèipichean no clàran. tha leabhraichean gu leòr ann, ach chan eil mòran rudan ri èisdeachd. nochd cuid rudan ùra aig comhairle nan leabhraichean ge-tà, mar eisimpleir "tearlag agus am bodach sneachd". agus bu toigh leam tèip eile a mholadh a gheibhear aig taigh na teud: "sgeulachd bhon ghlùin", air innse le crisdean dillon, ceithir sgeulachdan traidiseanta. tha leabhar beag agus tèip (no clàr a-nis?) ann, agus tha na sgeulachdan uabhasach àlainn, air innse ann an dòigh glè shnog.
leis an stuth seo, mar eisimpleir, b' urrainn don neach-ionnsachaidh èisdeachd cuid tursan an toiseach, gun coimhead air an teacsa idir. leis na rudan bho chomhairle nan leabhraichean dh' fhaodadh sibh an tèip a cheannachd an toiseach, agus an leabhar turas eile cuid seachdainean as-dèidh sin ;-)
nam bheachd-sa 's e dòigh fìor mhath agus feumail a th' ann airson an comas èisdeachd a leasachadh.
dè ur beachdan? dè na dòighean eile a tha agaibh fhèin?

moladh radio

2005-12-05T10:59:00.000+01:00

Ma tha sibh airson rudan uabhasach inntinneach agus èibhinn a chluinntinn, seo moladh dhuibh:
Bidh fios aig mòran dhiubh gu bheil "Èisd a-rithist" aig Radio nan Gaidheal. Faodar èisdeachd ri prògraman a bha ann an seachdain sa chaidh. Tha mòran ann agus mura bheil mòran tìde agibh, is dòcha nach bi sibh cho cinnteach dè bhitheas math no inntinneach do luchd-ionnsachaidh.
Feumaidh mise ràdh nach toigh leam cuid dè na daoine air an radio a bhitheas a' bruidhinn gu math luath, ann an dòigh "Beurlach", mar esimpleir anns na naidheachdan. Is fheàrr leam-sa èisdeachd ri daoine le deagh Ghàidhlig. Agus fhuair mi a-mach gu bheil rud snog ann aig deireadh a' phrògram "A' Mire ri Mòr".
Bidh i a' bruidhinn air a' fòn ri bodach no cailleach air choreigin gach latha. Mar as trice 's e seo seann dhaoine às na h-Eileanan, no seann dhaoine le Gàidhlig bhon ghlùin co-dhiù. Bidh iad a' cabadaich mu rudan àbhaisteach, is dòcha mu cheòl, no mun bheatha aig na daoine.
Chan eil e daonnan uabhasach math ri thuigsinn, o chionn 's gu bheil blàs no dual-chainnt sònraichte aca. Ach gu tric bidh iad a' bruidhinn gu math slaodach, oir chan eil iad cleachdte ri bruidhinn air an radio, agus bidh iad a' smaoineachadh mu dè tha iad ag iarraidh a ràdh. (Tha dòigh bruidhinn nas slaodaiche aig daoine aosda co-dhiù, tha mi a' smaoineachadh.)
Agus chan eil na cùspairen ro dhoirbh, tha sin feumail do luchd-ionnsachaidh cuideachd, agus cha bhi e ro fhada, dìreach 10 mionaid no rud mar sin. Agus tha mi dìreach a' smaoineachadh gur e cothrom uabhasach math a th' ann Gàidhlig nàdurrach a chluinntinn.
Tha e beagan doirbh sin a lorg anns a' phrògram: tha dà dhòigh ann. Faodaidh sibh dìreach èisdeachd ris a h-uile rud, agus bidh e anns na 10 mionaid mu dheireadh (tha am prògram mu 80 mionaid gu lèir).
Mura bheil tìde no ùidh agaibh, faodaidh sibh "leum" air adhart. Chan urrainn ach leum 5 no 15 mionaid air adhart, agus cha bhi sin ag obrachadh ach gu deireadh a' chiad uair a thìde. An uair sin tha "gearradh" anns a' phrògram, o chionns gun robh na naidheachdan ann agus thilg iad sin a-mach airson "Èisd a-rithist". As-dèidh a' ghearraidh sin bidh am prògram a' ruith air adhart mar a bha e, agus faodar "leum" 5 mionaid air adhart a-rithist, ach feumaidh sibh a bhith faiceallach an uair sin o chionn 's gun tig an agallamh leis an tè no fear aosda a dh' aithghearr.

Is toigh leam gu mòr sin, agus tha mi an dòchas gu bheil sibh a' tuigsinn a' mhìneachaidh seo agus gun còrd e ruibh cuideachd. Ma thogras sibh, innsibh dhomh an do dh' èisd sibh ris agus ciamar a bha e a' còrdadh ruibh.

seòmar chòmhraidh gàidhlig

2005-12-03T12:12:00.000+01:00

bha oidhche annabarrach èibhinn againn a-raoir anns an t-seòmar chòmhraidh. 's e àite dìreach sgoinneil a th' ann. chan ann a-mhàin gu bheil e uabhasach feumail do luchd-ionnsachaidh na gàidhlig, ach cuideachd gu bheil e làn fealla-dhà is spòrs. as-dèidh latha fada trang is toigh leam coinneachadh ri daoine laghach agus cabadaich 'sa ghàidhlig. agus uaireannan bidh an còmhradh againn fìor chraicte is mi-mhodhail :-D an rud a tha a' còrdadh gu mòr rium, 's e gun tig daoine às na ceithir ranna ruadha dhan t-seòmar, le cànanan eadar-dhealaichte, ach ùidh aca uile anns a' ghàidhlig. a-raoir bha daoine à chile, an spàinnt, sasainn, a' ghearmailt, alba agus astràilia ann, agus tha feadhainn eile againn ann an canada, alasca, agus àitean eile. nuair a bhitheas e mu mheadhan-oidhche agam, bidh e tràth 'san fheasgar ann an alba nuadh, agus mu mheadhan-latha ann an alasca... agus cha chreid mi nach bidh e mu mheadhan-latha cuideachd ann an astràilia, ach 's e an ath-latha a bhitheas ann mar-tha. nach craicte sin? :-D
ma leughas sibh seo agus cha robh sibh eòlach air an t-seòmar chòmhraidh againn roimhe, thigibh a-steach! bidh fàilte chridheil oirbh gun teagamh!

sgeul aig eòsaph

2005-12-02T14:26:00.000+01:00

a charaidean,
cuiribh freagairt gu eòsaph anns a' bhlog aige, as-dèidh an sgeul craicte aige a leughadh! cuiridh sin brosnachd dha tuilleadh a sgrìobh. tha e inntinneach gu dearbh. hmmmm... agus gheall mi ris gun innis mi sgeul no dhà "bho laithean m' òige" (haha) an-seo cuideachd. mo chreach-sa thàinig! :D

cianalas... no rudeigin

2005-12-01T22:20:00.000+01:00

tha mi ag iarraidh siubhal... dol air saor-laithean do h-àitean inntinneach anns nach robh mi riamh... na laithean seo tha mi a' smaoineachadh mu rudan mar seo gu math tric, a' coimhead air làraich-lìn fiosrachaidh mu dùthchanan anns a bheil ùidh agam, mar eisimpleir nirribhidh, innis tile, lietuva, a' ghrionnlainn... tha mi ag ionnsachadh na cànanan aca, no tha mi a' feuchainn co-dhiù agus bu toigh leam dol ann airson bruidhinn ri daoine... ach chan eil airgead gu leòr agam idir agus tha mi beagan brònach nach urrainn dhomh dol ann a dh' aithghearr idir idir. carson a tha na dùthchanan as toigh leam cho daor? :(

leabhar ùr - cànan eile

2005-11-30T21:06:00.000+01:00

uiui, tha mi toilichte an-diugh. 'sa mhadainn thug mi sùil air a' chunntas banca agam (nach feumail a tha sin air an eadar-lìon) agus chunnaic mi gun d' fhuair mi an t-airgead bhon obair anns an sgoil choimpiutair mu dheireadh thall (airson dàmhair!). air an rathad dhan stèisean fhuair mi airgead bhon inneal bhanca agus nuair a bha ùine shaor agam aig an oilthigh, càit an deach mi, hmm? uill, dhan bhùth leabhraichean, cha chuir seo iongnadh oirbh ;) cheannaich mi seo:

hmmm, dè tha sin, bidh sibh a' faighneachd dhìom? 's e leabhar beag mun chànan samais, air a bhruidhinn anns na sgìrean taobh tuath nirribhis, an t-suain agus suomi (finland). tha ùidh mòr agam anns a' chànan sin, agus bha mi ag iarraidh ionnsachadh bhon latha nuair a chuala mi an seinneadair samach (? hihi, chan e "sàmhach") mari boine - cha chreid mi seo, a rèir coltais chan eil làrach-lìn aice idir idir. is bochd sin gu dearbh. tha i fìor mhath, bidh i a' seinn anns an dòigh tràidiseanta, a tha gu math sònraichte, ach ann am measgachadh le ceòl jazz agus pop. tha guth àlainn aice agus tha i gu math snog agus tha beachdan inntinneach aice mu chùltar agus poileataics (leugh mi cuid agallaimh leatha).
uill co-dhiù, bha ùidh agam anns a' chànan, ach - coltach ris an t-suidheachadh aig mòran daoine a tha ag iarraidh gàidhlig ionnsachadh - cha robh fios agam ciamar a nì mi sin. cha robh leabhraichean ann, cha robh mi eòlach air duine sam bith eile aig an robh ùidh anns a' chànan, agus aig an àm sin, o chionn mu dheich no còig bliadhna deug, cha robh an eadar-lìon agam agus cha robh e cho mòr agus trang na tha e an-diugh co-dhiù.
uill, dhìochuimhnich mi mun chànan sin an uair sin, ach an uair sin, o chionn bliadhna no dhà, thachair mi ris a-rithist, agus lorg mi leabhraichean aig an oilthigh, ach bha iad gu math sean agus cha robh iad feumail airson ionnsachadh idir. dh' fheuch mi ri daoine a lorg air an lìon cuideachd, ach cha d' fhuair mi lorg air mòran... ach a-nis, tha an leabhar beag snog seo agam, agus bidh clàr le fuaim a' chànain ann cuideachd, agus cha chreid mi nach chuir mi post-d don tè a sgrìobh an leabhar agus is dòcha gu bheil i eòlach air àitean air an eadar-lìon far am b' urrainn dhomh mo chuid samais a chleachdadh agus a leasachadh agus cabadaich ri daoine aig a bheil an cànan.
chì mi...

dearg

2005-11-29T22:27:00.000+01:00

oh tha mi cho toilichte a-nis gach turas a tha mi a' coimhead air an làrach-lìn seo :) tha mi gu math cinnteach gun sgrìobh mi tuilleadh anns a' bhlog seo a-nis o chionn 's gu bheil an sealladh ùr a' còrdadh rium glan agus a' toirt brosnachadh dhomh.

thuirt sibh uile gu bheil e chooooo dearg. hmm, leis an fhìrinn chan eil e chooooo dearg, a bheil? tha e dearg dorcha, beagan mar fhuil no meirg, tha mi a' smaoineachadh. seo mar a tha e air an sgrìon agam-sa co-dhiù. is toigh leam an dath seo gu dearbh. bheir e neart agus deagh shunnd thugam. is toigh leam craobhan le duilleagan a dh' fhàsas dearg as t-fhoghar.

naidheachdan eile? oh, fhuair mi leabhar gàidhlig ùr, "cuimhneachain phrìseil", tha e snog ach cha do leugh mi mòran fhathast. tha sgeulachdan ann, air innse le daoine aosda anns na hearadh, air cruinneachadh le sgoilearan ann am pròiseact sònraichte. chunnaic mi gu bheil sgeulachdan beaga èibhinn ann, agus cuimhneachain bhon bheatha aig na daoine aosda cuideachd.

an ath-sheachdain feumaidh mi òraid bheag a ghabhal anns a' chlas nirribhis aig an oilthigh - feumaidh gach duine anns a' chlas sin a dhèanamh turas no dhà 'san term, mu chùspair sam bith, ach ann an nirribhis :)
cha chreid mi nach bi mi a' bruidhinn mu na h-eileanan sìar agus buaidh nan lochlannach air a' chùltar gàidhlig no rudeigin... 's àbhaist dhomh a bhith gu math leisg le nirribhis, ged as bochd sin - tha mi air an cànan seo ionnsachadh barrachd air bliadhna, agus bu chòir dhomh a bhith fada nas fheàrr na tha mi. agus chan e cànan uabhasach doirbh a th' ann, chan e idir, tha e gu math furasda. bidh duine le beurla no/agus gearmailtis a' tuigsinn mòran ann an nirribhis sgrìobhte. chan eil an gràmar doirbh. tha blàs-cainnte no dual-chainnt eadar-dhealaichte ann, agus uaireannan chan eil e furasda na daoine a thuigsinn. ach tha tìdsear glè laghach agam, 's e kari an t-ainm a th' oirre agus tha i à oslo ("uisleo", mar a chanas iad, hehe, dh' fheuch mi a chur ann an dòigh-sgrìobhaidh gàidhlig an-seo). bidh i a' bruidhinn ann an nirribhis ruinn fad na h-ùine, ach ann an dòigh furasda, soilleir.
fhuair mi a-mach gu bheil an tidsear ceart glè chudthromach dhomh ann an ionnsachadh cànain. cha bhi mi ag ionnsachadh mòran le tidsear nach bi a' toirt misneachd do na sgoilearan, nach eil laghach agus foighdineach, nach eil deonach ri taic a thoirt dhuinn anns an ìre freagarrach... is fheàrr leam ionnsachadh leam fhìn seach ionnsachadh le tidsear dona :(
ceart ma-tha, chì mi dè bhitheas a' dol le nirribhis... :)

aodach ùr ;)

2005-11-28T12:30:00.000+01:00

woho, chaidh agam ris na dathan atharrachadh an-seo, mu dheireadh thall... leis an fhìrinn innse, cha robh an dubh a' còrdadh rium idir, ach bha mi ro leisg agus bha beagan eagal orm gum millinn a h-uile script nan rachainn ann airson rudan atharrachadh.
tha mi air feuchainn ri cuid rudan eile atharrachadh cuideachd - tha mi ag iarraidh na laithean agus rudan eile anns a' ghàidhlig... agus tha mi air coimhead air an script aig cadalach gu mionaideach (duilich, hehe ;) ), ach chan eil mi air faighinn a-mach càite agus ciamar a nìthear e.

as-dèidh deich mionaid:
aha, tha am fo-sgrìobhadh ceart gu leòr a-nis, ach càit a bheil na laithean??? :o cuidichibh miiiiiiiii! ;-) *a' dol air as dhan script*

cairteal na h-uaireach as-dèidh sin:
tha iad ann!!! hihihi! tha iad aaaaaaannnnnn! chan eil mi cho dona, a bheil?
MÒRAN TAING DO CHADALACH, bha an script agad agus am mìneachadh a chuir thu ann gu math feumail, gu h-àraidh airson an nighean ghòrach seo a th' annam :-D

naidheachd snog eile: tha na sanasan gòrach air falbh bhon bòrd-bràth gàidhlig-gearmailteach - tha sin a' cosg beagan airgid, ach tha am bòrd fada nas luaithe agus nas brèagha gun an stuth gòrach a bha a' fosgladh gach turas a rachar (???? facal neònach) ann. tha mi gu math cinnteach nach robh ùidh aig duine sam bith anns na fuaimnean airson fòn làimh, no geamaichean choimpiutair agus dè eile a bh' ann...
mona

deireadh-seachdaine gàidhlig

2005-11-28T09:22:00.000+01:00

Bha deireadh-seachdaine làn Gàidhlig againn. Bha bùth-obrach ann aig Mìcheal ann am Bonn, agus bha daoine laghach le deagh Ghàidhlig ann. Rinn sinn mòran rudan inntinneach agus bha spòrs mòr againn cuideachd.
Ràinig mi gu math anmoch Di-Sathairne, o chionn 's gun robh mòran sneachda anns a' bhaile agam, agus cha robh na trèanaichean a' ruith gu ceart idir. Nuair a ràinig mi an sgoil aig Mìcheal, thachair mi ri càch a bha dìreach a' dol a dh' fhaighinn dìnear anns a' chafaidh. Bha biadh fìor bhlàsda againn, dh' ith mi brot glè mhath.

An uair sin leugh sinn pìos bàrdachd glè bhrèagha anns a' chùrsa, mu bhan-rìghinn nan ròn. Bha sinn ag obair le teacsan mu chòcaireachd cuideachd, bha sin gu math èibhinn - ged nach eil mi uabhasach measail air giomach agus biadh na mara eile, feumaidh mi ràdh. 'San fheasgar, as-dèidh a' chùrsa, bha rud inntinneach eile ann: "Oidhche Albannach" faisg air Aachen, le film Gàidhlig agus cuirm-ciùil, agus rudan eile - gu h-àraidh uisge-beatha, mar a chunnaic sinn. Bha mi ag iarraidh dol ann, o chionn 's gu bheil am film "Is mise an teanga" a' còrdadh gu mòr rium. Choimhead mi air a' chiad turas aig Fèis nam Filmichean Gàidhlig ann am Bonn an-uiridh. Anns am film seo, chuala mi an dàn "O ghrunnd na mara" le Kevin MacNeil a' chiad turas, agus sin an dàn a thug orm feuchainn ri bàrdachd Gàidhlig a sgrìobhadh cuideachd...

Mar sin, chaidh mi a Würselen còmhla ri Mìcheal, agus rinn sinn "bùth" bheag leabhraichean ri taobh na bùth mòooor uisge-beatha. Bha an àite gu math trang (uill, cha robh aig a' bhùth againne...), agus bha na daoine a chur am Fèis seo air dòigh uabhasach toilichte, tha mi a' smaoineachadh. Thàinig a' mhòr-chuid de na daoine airson uisge-beatha fheuchainn, agus bha mòran daoine neònach ri fhaicinn, Gearmailtich le aodach cho Albannach, nas Albannaiche na na Albannaich fhèin, haha... Ach bha daoine gu leòr anns an taigh-dhealbh nuair a bha am film ann cuideachd.

Ach is bochd gun robh iad air am film a ghiorradh. Bha cuid de na rudan a bha mi a' feitheamh riutha air chall. Chan eil mi buileach cinnteach a-nis an robh "O ghrunnd na mara" ann idir? Ach tha mi gu math cinnteach gun cuala mi e... mus leugh mi e anns an Leabhar Mòr. Agus bha rudeigin anns am film mun daoine a rinn am pìos ealain ris an dàn seo, rudeigin le filmean (photo films, na rudan dubha a chuireas tu ann an camara ;) ) fon uisge...
Feumaidh mi am film seo a cheannachd, tha mi a' smaoineachadh (bha mi glè thoilichte a chluinntinn gu bheil e ri cheannachd!).

As-dèidh a h-uile rud, chuir Mìcheal dhan stèisean mhòr ann an Köln mi - tapadh leat, a Mhìcheil! - agus bha dùil agam gum bitheadh trèana gu Wuppertal ann aig còig mionaid gu meadhan-oidhche. Ach thuirt iad gum bitheadh an trèana 10 mionaid fadalach. An uair sin thuirt iad gum bitheadh e 20 mionaid fadalach. Agus an-dèidh 20 mionaid thuirt iad nach bitheadh e ann idir. Feumaidh gun robh an trèana air chall ann an toll ùine eadar Brühl agus Köln... (àiteigin timcheall air Hürth-Kalscheuren, is dòcha...). Bha aig a h-uile duine feitheamh rish an trèana aig còig mionaid gu uair, agus bha mi aig an taigh mu dhà uair. Mar sin bha mi gu math sgìth nuair a dh' èirigh mi 'sa mhadainn an-diugh, agus chaidh mi gu Bonn a-rithist.
Ach bha an cùrsa glè mhath agus bha mi toilichte gun robh mi ann. Dh' innis Janni an sgeul mu MhacCodrum nan Ròn, agus bha sin dìreach sgoinneil. Choimhead sinn air film beag snog cuideachd, "Foighdinn".
Agus mu dheireadh thall chaidh sinn dhan bhaile agus choimhead sinn air togalaichean / àitean inntinneach, agus an uair sin dh' òl sinn fìon teth còmhla aig fèill na Nollaige. Bha mi gu math sgìth air an t-slighe dhachaigh, agus bha mi nam chadal air an trèana.
Tha sneachda gu leòr againn an-seo fhathast. Cuiridh mi cuid dhealbhan suas.

mona

càit a bheil an latha??

2005-11-13T21:04:00.000+01:00

tha na laithean a' dol seachad cho luatha 'san aimsir seo. hmm, is dòcha gum bu chòir dhomh èirigh nas tràithe 'sa mhadainn cuideachd... ;) ach co-dhiù, mu chòig uairean feasgar thig an dorchadas a-rithist, agus bidh mi a' faireachdainn sgìth agus leisg. chan eil mi a' dèanamh mòran na laithean seo, ged a bu chòir dhomh agus bu toigh leam. chan eil mi cinnteach ciamar a dh' atharraicheas mi seo. chì mi am bi seo a' fàs nas fheàrr an seachdainn 'sa tighinn... tha mi air mo shàrachadh an-diugh cuideach o chionn 's gun do chaill mi sgoilear (chan eil a mhàthair ag iarraidh gun tèid mi ann tuilleadh) agus tha mi gu math cinnteach gun caill mi tè eile o chionn 's gu bheil a màthair a' gearan fad na h-ùine, agus bidh an t-airgead gann a-rithist, agus uaireannan is beag orm a h-uile rud seo, nach bi mi riamh cinnteach mun airgead agus an obair agam ag atharrachadh fad na h-ùine, ach aig an aon àm tha fios agam gu bheil mi gu math fortanach leis an obair seo air mo cheann fhèin... gaaaah. bu toigh leam am lottery a bhuannachd (haha, nàire orm, bha agam ri coimhead anns an fhaclair airson "buannaich" -> "buannachd", cha robh mi idir cinnteach).

thòisich mi sgrìobhadh ann am forum lithuanian mu cheòl ròc / metal an-dè, tha sin uabhasach èibhinn. thòisich mi an cànan sin ionnsachadh bliadhna air ais aig an oilthigh, agus cha do chleachd mi e gu tric fhathast. cha bhi sinn a' bruidhinn mòran anns a' chlàs, dìreach a' leughadh agus a' dèanamh obraichean anns an leabhar. 's e cànan àlainn inntinneach a th' ann, agus bu toigh leam a bhith nas fheàrr air. ach bha mi gu math leisg agus cha do rinn mi mòran air a shon. feumaidh mi faclair a cheannachd cuideachd, ach lorg mi faclair air an eadar-lìon, agus is urrainn dhomh còmhradh furasda a dhèanamh. ach tha mi gu math slaodach... agus an toiseach, cha robh na daoine anns a' bhòrd-bràth ud a' creidsinn gur e ban-ghearmailtis a th' annam agus gu bheil mi ann airson ionnsachadh, bha iad dhen bheachd gu bheil mi a' tarraing àsta. pfffff.... uill, chì mi dè bhitheas a' dol...
mona

"blogaichean - a bheil iad math?"

2005-11-08T20:28:00.000+01:00

thòisich mìcheal deasbad inntinneach mu bhlogaichean an-seo. nach tèid sibh ann agus innsibh ur beachdan?

taighean brèagha

2005-11-06T15:47:00.000+01:00

chaidh sinn air cuairt beag tro roinn àlainn inntinneach anns a' bhaile seo an-diugh. 's e seo am "briller viertel", le mòran taighean "art noveau" agus "wilhelminian style", bho deireadh an 19mh linn agus toiseach an 20mh. chuala mi nach eil baile eile anns a' ghearmailt le tuilleadh taighean anns an dòigh seo, anns an aon àite cho faisg air chèile. anns na bailtean mòra chaidh mòran taighean aosda a bhriseadh anns an dàrna cogaidh, agus anns na bailtean beaga, cha robh mòran daoine cho beartach ann a thog taighean-baile mar sin.
bha gnìomhachas clò pailt anns a' bhaile seo gu math tràth, agus dh' fhàs gnìomhachas cemiceach an uair sin. mar sin bha gu leòr daoine beartach aig an robh na gnìomhachasan mòra, agus thog iad taighean mòra brèagha cuideachd.
thogadh tè ainmeil anns a' phàirt ud dhen bhaile cuideachd: else lasker-schüler, 's e ban-bhàrd iùdhach a bh' innte.

seo cuid dhealbhan a thog mi an-diugh.
mona

ann an sunnd fogharach

2005-11-05T18:34:00.000+01:00

mise an-diugh.

is dòcha... ;-)

2005-11-05T14:20:00.000+01:00

liosta miann airson bodach na nollaige ;-)

* Aonghas MacNeacail: Sìreadh Bradain Sicir
* Martainn Mac an t-Saoir: Ath-Aithne 6 CD Box set
* Norman MacLean: Dacha Mo Ghaoil 3 CD Set
* An Guth 1
* An Guth 2
* Ronald Black: An Lasair - An Anthology of 18th Century Scottish Gaelic Verse
* Ronald Black: The Gaelic Otherworld
* Ronald Black: Cothrom Ionnsachaidh - book
* Colin Mark: The Gaelic-English Dictionary - Am Faclair Gaidhlig-Beurla
* Alexander Nicolson: Gaelic Proverbs
* Domhnall Uilleam Stiubhart: Moladh Da Bheinn DVD
* Iain MacIlleathain agus Maletta NicPhail: Seanfhacail is Seanchas
* Aonghas Padraig Caimbeul: An Oidhche Mus Do Sheol Sinn
* An t-Aite as Fhearr Leam
* Trueman Matheson: Deirdrie and The Lay Children of Uisne
* Eagal san Dorchadas agus stoiridhean eile
* Leabhar Beag na Gaidhlig - The Wee Book of Gaelic
* Tearlag agus am Bodach-Sneachd - cassette tape
* Tearlag agus na Spainean - cassette tape
* The Giant's Causeway DVD
* Donald Meek: Caran an t-saoghail - an Anthology of 19th Century Verse
* Somhairle MacIlleathain: Dain do Eimhir
* Ruairidh MacThòmais: Saorsa agus an Iolaire

tha fios agam... :-( cus.

naidheachdan fadalach

2005-11-05T12:31:00.000+01:00

bha rudan gu leòr a' tachairt an-seo o chionn goirid, ach bha mi beagan leisg leis an sgrìobhadh an-seo.

bha "oidhche ceilteach" ann, anns an taigh-tasgaidh ann am bonn, agus bha rudan co-cheangailte ri gàidhlig a' tachairt an-sin cuideachd. bha mìcheal a' seinn òrain gàidhlig, bha cuirm-ciùil eile ann le ceòl èireannach, bha buidheann ann a dh' innis rudeigin mu cheòl seann ghrèigis agus ròmanach agus seann cheilteach (ged a bha aca ri aideachadh nach eil mòran a dh' fhios againn idir mu cheòl seann cheilteach). fhuair sinn fiosrachadh mu aodach ceilteach agus dòigh beatha ceilteach cuideachd, agus bha am film "màiri mhòr nan òran" ann. choimhead mi air an fhilm seo aig fèis nam filmichean gàidhlig dà bhliadhna air ais mar-tha, ach bha e snog fhaicinn a-rithist. t

seachdain as-dèidh sin, a' chiad latha dhen t-samhain, rinn mìcheal cuirm-ciùil eile, le òrain agus sgeulachdan freagarrach dhan latha. bha e math fhèin, agus chaidh janni agus mise ann ann an aodach bhan-bhuidseach ;) ma tha sibh airson dealbhan fhaicinn, seallaibh air a' chùspair anns a' bhòrd-brath gàidhllig-gearmailtis.

rud eile a bha a' còrdadh gu mòr rium, tha loudspeakers agam aig a' coimpiutair a-rithist mu dheireadh thall (chan e gun robh iad a dhìth orm roimhe, 's ann dìreach gun do chaill mi iad nuair a bha mi a' gluasad an àirneis-taighe agus a' sgioblachadh an t-seòmair mhòir, agus cha d' fhuair mi lorg orra a-rithist gu ruige seo...) - agus b' urrainn dhomh sùil - agus cluas ;) - a thoirt air gaelcast. bha mi ag èisdeachd ris a' chiad agus dàrna phrògram, agus bha sin gu math inntinneach agus deànta ann an dòigh laghach.

tha telebhisean gàidhlig ri faighinn air an lìon an-dràsda cuideachd, beagan co-dhiù. bha mi a' coimhead air "eòrpa" an-dè, bha cùspairean inntinneach aca, mu chroitearan ann an alba, agus daoine turcach anns a' ghearmailt, agus rudan eile. ach bha an tè bhon BhBC a' bruidhinn uabhasach luath. bha mi a' tuigsinn nan daoine à leòdhas nas fheàrr! :o

chunnaic mi mòran leahraichean ùra inntinneach aig comhairle nan leabhraichean, ach chan eil airgead sam bith agam an-dràsda... uill, tha, ach feumaidh mi e airson rudan eile, nas cudthromaiche. am bu toigh le cuideigin leabhar gàidhlig a thoirt thugam mar tiodhlac nollaige? ;D hehe...

obh obh, feumaidh mi obair rud beag an-dràsda.
mona

òran shamhna ;)

2005-11-01T01:10:00.000+01:00

leugh mi rud èibhinn air an liosta post-dealain seann ghàidhlig an-diugh: rinn donnchadh king òran beag, freagarrach dhan fhonn aig "frère jacques":

adaig shamna, adaig shamna,
an istig, an istig!
oslaictear na síde, oslaictear na síde,
an istig, an istig!

nach eil càil a dh' fhios mu sheann ghàidhlig? uill, chan eil e choooo eadar-dhealaichte bho gàidhlig an-diugh:
adaig = oidhche, an = fan, fuirich, feitheamh, istig = a-staigh, oslaictear ~ thèid am fosgladh, síde = sithichean (a' ciallachadh àitean nan sithe an-seo).

turas beag

2005-10-30T21:23:00.000+01:00

bha mi ann an düsseldorf an-diugh, 's e seo prìomh-bhaile an sgìre seo. 's e baile mòr a th' ann, beagan "posh", ach tha àitean gu math brèagha ann. mar eisimpleir am pàirc seo. tha e farsaing, le oiseanan àlainn, gu h-àraidh an garradh seapanach.

tha mi cho beò

2005-10-30T21:10:00.000+01:00

foghar - slighe lùbach mall-cheumach
tro duilleagan, feur tioram, sùilean nam flùraichean searga ri taobh an rathaid
foghar - an rathad loinnreach luath, sìos, sìos
a-steach do na coilltean, nan teine deàlrach
a-steach d' fhàileadh luaith, ceò, còinnich boig, talmhainn fionnaig
fon adhar farsaing, ciùin, suthainn, gorm domhain.

blog ùr

2005-10-18T22:19:00.000+02:00

tha fear ùr againn a-rithist, fàilte do eòsaph às na stàitean aonaichte, an gaidheal iùdhach.

eòsaiph, cuiridh mi ceangal ann dhut an-seo cuideachd :)

coilltean mo chridhe

2005-10-18T22:05:00.001+02:00